DILI, STLTIMORLESTE.com – Padre Paul Kerans, SVD konvida ema hotu atu revela Maromak nia prezensa mizerikórdia ba ema hotu, lahó diskriminasaun.
Padre Paul Kerans, SVD hato’o mensajen ida-ne’e ba STL Segunda (05/10/2026) iha nia refleksaun ba Evangelhu tuir Lucas 10:25-37, kona-ba ai-knanoik “Ema Samaria Di’ak”.
Nia hatete katak, iha moris loroloron, ema presiza aprende atu haree ema seluk hanesan maluk, liuliu sira ne’ebé iha nesesidade no presiza ajuda.
“Ita tenke revela Maromak nia prezensa mizerikórdia nian ba ema hotu lahó diskriminasaun,” katak Padre Paul.
Padre Paul esplika katak, iha Evangelhu ne’e, jurista husu pergunta rua ba Jesus. Pergunta daruak mak “Sé mak ha’u-nia maluk?” Jesus la responde pergunta ne’e ho definisaun kona-ba sé mak maluk, maibé uza ai-knanoik kona-ba “Ema Samaria Di’ak” atu hatudu signifikadu husi sai maluk ba ema seluk.
Tuir Padre Paul, Jesus iha rohan husi ai-knanoik husu fila-fali “Husi sira na’in-tolu ne’e, ida-ne’ebé mak hatudu katak nia mak maluk?” Pergunta ida-ne’e muda perspetiva. Ema la’ós de’it presiza husu sé mak nia maluk, maibé presiza komprende katak nia rasik tenke sai maluk ba ema seluk, liuliu ba sira ne’ebé presiza.
Padre Paul hatete katak, viziñu loloos la halo distinsaun entre ema ne’ebé konsidera hanesan maluk no ema ne’ebé la konsidera hanesan maluk.
Iha ai-knanoik, ema Samaria ajuda viajante ida ne’ebé kanek iha dalan, maski iha diferensa entre sira nia grupu no relasaun sosial.
Atu Padre Paul, ezemplu ne’e hatudu katak mizerikórdia Maromak nian la iha limite no la depende ba identidade, origem, relijiaun ka diferensa sosial.
Nia subliña katak, ema ne’ebé hakarak moris tuir ensinamentu Jesus tenke aprende atu fó-an ba ema hotu, sem haree ba sira nia diferensa.
“Jesus, hanesan ema Samaria, la halo distinsaun. Nia fó-an hanesan ba ema hotu-hotu, ema Judeu ka ema Samaria ka ema la’ós Judeu,” dehan Padre.
Mensajen ne’e mos konvida komunidade kristaun atu la limita bondade no solidariedade ba ema ne’ebé besik de’it, maibé estende ba ema hotu ne’ebé presiza.
Padre Paul hatete katak, iha realidade moris loroloron, mizerikórdia bele hatudu liu husi asaun simples, hanesan ajuda ema ne’ebé iha difikuldade, fó atensaun ba ema ne’ebé sofre no la halo diskriminasaun.
Nia salienta katak, bainhira ema trata ema seluk ho dignidade no domin, ema bele sai instrumentu ida atu revela Maromak nia prezensa iha sosiedade.
Ai-knanoik Ema Samaria Di’ak, tanba ne’e, la’ós de’it istória kona-ba ema ida ne’ebé ajuda ema kanek, maibé konvite atu ema hotu transforma maneira haree no trata malu.
Padre Paul konvida ema hotu atu kontinua revela Maromak nia prezensa mizerikórdia nian liu husi sira nia hahalok, domin no servisu ba ema seluk, lahó diskriminasaun.
(eme)
