DILI, STLTIMORLESTE.com – Prezidente Repúblika (PR), José Ramos-Horta hala’o audiénsia ho Embaixadór Britániku Dominic Jermey hodi haforsa relasaun bilaterál.
Prezidente Repúblika José Ramos-Horta, Segunda-feira (28/09/2026), simu audiénsia iha Palásiu Prezidensiál Nicolau Lobato ho Embaixadór la’ós-rezidente Reinu Unidu ba Timor-Leste, Dominic Jermey.
Enkontru diplomátiku ne’e diskute importánsia relasaun bilaterál entre nasaun rua no reafirma kompromisu atu serbisu hamutuk hodi apoia dezenvolvimentu no seguransa globál.
Durante reuniaun, diplomata Britániku ne’e fó-hanoin fali katak nia vizita dahuluk mai Timor-Leste iha períodu tuirmai Konsulta Popular 1999, no destaka ligasaun umana metin entre nasaun rua.
Hafoin enkontru, Embaixadór Dominic Jermey hatete ba jornalista katak Governu Britániku rekoñese kontribuisaun sidadaun Timoroan liu 30.000 ne’ebé agora hela no serbisu iha Reinu Unidu, hodi fó rikusoin ba sosiedade Británika.
Alende ne’e, nia foti aas kooperasaun mútua entre nasaun rua iha kuadru Nasoins Unidas, ho objetivu atu kontribui ba harii mundu ida ne’ebé seguru liu.
Nu’udar parte husi ajenda ofisiál iha Timor-Leste, Embaixadór informa Xefe Estadu kona-ba ninia atividade sira tuirmai, inklui enkontru ho Primeiru-Ministru Kay Rala Xanana Gusmão no vizita ba terrenu.
Dominic Jermey sei desloka ba Munisípiu Vikeke no rejiaun sira seluk atu akompaña besik projetu apoiadu husi Governu Reinu Unidu, liuliu kona-ba reziliénsia kosteira no dezenvolvimentu sustentavel Timor-Leste.
(eme)
