DILI, STLTIMORLESTE.com – Embaixador Timor Leste (TL) ba Organizasaun Nasoens Unidas (ONU), Dionisio Babo relata relatoriu pontu tolu (3) ba Prezidente Republika (PR), Jose Ramos Horta.
Bainhira remata hasoru malu, Embaixador Timor Leste ba ONU, Dionisio Babo ba jornalista sira iha Palasiu Prezidensia Nicolau Lobato, Bairo Pite, Kuarta nee (24/06/2026) hatete, ohin hasoru malu ho Prezidente Republika, mai komprimenta Prezidente, aleinde nee relata relatoriu pontu neebe importante durante nia misaun iha ONU ba Prezidente Republika.
“Hau mai komprimenta senhor Prezidente tanba hau mai ita nia rai nee la espera tanba iha assuntu pesoal, hau nia mae Nain Maromak bolu hikas ona nee mak hau mai, depois aproveita, mai komprimenta senhor Prezidente Republika atu hatoo relatoriu konaba servisu misaun permanente Timor Leste nian iha Nasoens Unidas neebe halao durante tinan ida nee,” dehan Embaixador.
Embaixador hatete, pontu tolu neebe nia hatoo ba Prezidente Republika Jose Ramos Horta konaba bijibilidade, kredibilidade no respeitadu durante halao misaun iha Nasoens Unidas.
“Mai hatoo mos relatoriu konaba nivel alkansa neebe mak ita nia misaun halo hodi eleva Timor Leste nia profile internasionalmente liu liu iha ONU, durante nee ami aposta iha pontu tolu, primeiru konaba bijibilidade, segundu kredibilidade, terseiru respeitadu iha Nasoens Unidas no nivel trabalhu neebe mak ami halo sente kata alkansa neebe diak tebes,” dehan Embaixador.
Iha enkontru nee Embaixador ho Prezidente Republika Jose Ramos Horta koalia assuntu neebe iha relasaun ba altu nivel neebe sei halo iha Setembru mai.
Aleinde nee koalia mos oituan konaba situasaun politika internasional neebe akontese daudaun iha Mediu Oriente funu entre nasaun sira Mediu Oriente hamutuk ho nasaun boot sira hanesan Amerika no sira seluk tan neebe presiza mos Timor Leste hanesan pais kiik ida oinsa iha perante forsa internasional.
“Pozisaun sira neebe ita hola hanesan membru Nasoens Unidas para respeita nafatin UN Charter Konvensoens Internasional, rezolusaun internasional nomos valor no prinsipiu demokratiko neebe promulga,” hakotu.
Iha biban nee Prezidente Republika, Jose Ramos Horta hatoo sentidu kondelensia ba Embaixador neebe lakon inan tanba fila hikas ona Nai nia kadunan Santo, no husu mantein halao knaar ho diak hodi reprezenta Estadu Timor Leste iha Nasoens Unidas.
(eme)
