AMBENO, STLTIMORLESTE.com – Embaixador Portugal iha Timor Leste (TL) Duarte Alves, akompanha husi Dotora Lina Vicente, husi Projetu Cafe, halao Vizita dahuluk hafoin asume knaar Embaixador.
Embaixador Portugal iha TL, Duarte Alves ba STL iha Centro Aprendizajen Formasaun Eskolar (CAFE), Kiumaria Palaban Oecusse, Suku Costa, Postu Administrativu Pantemamasaar RAEOA, Segunda (29/06/2026) dehan, ida nee mak vizita espesial ida.
“Ita hotu hatene katak, istoriku, Portugal sempre iha ligasaun ho Timor Leste (TL), ligasaun klean ho rejiaun administrativa Espesial Oecusse-Ambeno, liu-liu iha nee, iha loron 1 fulan Agostu tinan 1515, Portuges sira too ba dala uluk iha TL Liu husi Odamatan Lifau Oecusse, tanba nee, ita nia istoria nee fahe malu komprensaun ba malu, lao hamutuk no buras hamutuk iha rejiaun Oecusse. Ohin dader, hau hasoru malu ho Prezidente Autoridade RAEOA hodi hatoo dezafiu sira, prezensa portuges nian no area potensial sira ba kolaborasaun no ba intensifikasaun Dialogu entre Portugal no rejiaun ida nee,” dehan Embaixador Portugal.
Nia haktuir tan katak, hafoin enkontru ho Prezidente Autoridade RAEOA, kontinua vizita eskola CAFE iha tasi Ibun Kiumaria Oecusse.
“Ita boot sira hatene, eskola sira CAFE maka projetu estraordinariu ida iha TL ho eskola 14 iha munisípiu sira neebe servi liu estudante 12,000 no profesor 135. Ami komprometidu tebes ba dezenvolvimentu edukasaun iha TL.
Nia dehan, Governu Portugal, hakarak kolabora ho Autoridade Timor oan sira.
“Ami hakarak kolabora ho autoridade timoroan sira, hodi kontribui edukasaun ba jerasaun foun sira. Hau sei vizita eskola CAFE iha Lospalos maski hau seidauk iha oportunidade, hau sei halo ida nee lalais liutan. Naturalmente, hau mos vizita eskola iha nee, koalia ho profesor Timor Oan sira nomos profesor portuges troka hanoin, komprende dezafiu sira, haree oinsa rutina loro-loron nian lao no aprende kona ba sira-nia moris no serbisu neebe sira halo,” afirma nia.
Iha vizita nee, Embaixador Portugal iha TL hasoru Autoridade Lokal, reprezentante Igreja Katolika nian, autoridade rejional sira, asosiasaun inan-aman sira nian no sira seluk neebe halao papel importante, Rona hanoin.
“Ami nia kompromisu hau fo sai iha nee ho klaru tebes ba prezidente RAEOA kompromisu neebe lao hela, Ita nia lasu nee atu hametin no klean liutan, ami hakarak serbisu hamutuk liutan. Hau hein katak, sei sai posivel desde kondisaun sira permite atu habelar liutan prezensa ida-nee. Atu konklui, ita hahu iha-nee iha tinan 1515 no tinan 511 liu tiha, ita nafatin iha populasaun no povu timoroan nia sorin,” Afirma Embaixador.
Iha biban nee, Mario mereilhes nuudar Koordenador Eskola Centru Aprendizajen Formasaun Eskolar (CAFE) Oecusse, Agrdese ba Vizita embaixador Portugal neebe maka ohin vizita Eskola Cafe Oecusse.
“Hau lori estrutura Eskola CAFE Oecusse ho alunus sira hotu, hahu husi Pre-eskolar too Secundaria iha eskola CAFE Oecusse, hatoo agradesimentu ba prezensa Embaixador Portugal iha TL neebe ohin vizita Eskola CAFE Oecusse,” dehan nia.
Tuir observasaun STL iha Oecusse, dadersan vizita dahuluk Embaixador Portugal Iha Oecusse o halao enkontru ho Prezidente Autoridade RAEOA, Regio da Cruz Salu ho estrutura Sekretariu Rejional no Diresaun sira hotu iha Gabinete Autoridade RAEOA Oebau Oecusse.
(jos)
