DILI, STLTIMORLESTE.com – Kandidatu Embaixador Estadu Unidos Amerika ba Timor Leste iha vizaun hakarak lori investor husi Amerika mai halo investimentu iha Timor Leste.
Kandidatu Embaixador Estadu Unidos Amerika Ba Timor Leste, Mark L Garber hatete nia iha vizaun boot hakarak lori investor husi Amerika atu mai halo investimentu iha Timor Leste liu liu iha area turismo nunee promove timor sai famozu liu tan.
Kandidatu Embaixador Estadu Unidos Amerika Ba Timor Leste, Mark L Garber hatoo kestaun nee ba jornalista bainhira remata halo enkontru ho Prezidente Republika Jose Ramos Horta iha palasiu Prezidensial Nicolau Lobato, Bairo Pite, Segunda (25/05/2026).
Kandidatu Embaixador hatete nia lori tempu naruk hodi halo observasaun ba Timor no tuir nia observasaun Timor sai fatin distinasaun ba Turista hanesan mos iha Bali tanba nee sei iha planu hodi hadia fatin turismo hodi dada turista sira mai Timor Leste.
“Hau iha vizaun hakarak lori investor sira husi USA mai investe iha area turismo neebe mak bele halo Timor sai famozu, tanba hau gosta halimar haree Timor nee bele prosferu,” katak Kandidatu Embaixador.
Kandidatu Embaixador nee haktuir tan katak durante nia iha Timor tuir nia observasaun haree Timor rai ida kiik maibe nasaun neebe furak no iha potensia barak no nia ema mesak diak hotu.
“Timor nasaun ida nee kiik oan maibe nasaun neebe furak no iha potensia barak, no ema timor oan ema mesak diak no furak deit, no ema neebe rama los, no hau mai liur tiha ona hau iha kolega barak ho ema Timor oan tanba nee hau hakarak haree Timor nee iha prospriedade,” katak nia.
Aleinde nee konaba halo visa tuir nia haree bainhira halo visa tenke viajen bai ha Jakarta gasta kustu barak tanba nee bainhira simu ona posse husi Prezidente Amerika sei muda Sistema nee no sei trata viza iha deit kapital Dili la presiza too Jakarta neebe gasta kustu barak no gasta tempu tanba nee durante nia mandatu sei aselera ida nee.
Nia mos enkoraja visitor sira atu mai vizita Timor no nia mos hakarak iha interasaun neebe klean liu entre estadu Unidos Amerika ho Timor Leste.
Nia mos sei promove Timor oinsa ema bele haree presfektiva Timor ho nia nasionalidade no ho maneira neebe iha oinsa bele aprende ba malu.
Iha hasoru malu nee Prezidente Republika Jose Ramos Horta iha esperansa boot no Prezidente Estadu Unidos Amerika Trump nomea lalais ba embaixador nunee bele mai halao misaun iha Timor Leste nuudar embaixador USA ba Timor Leste hodi halao servisu iha Timor.
(eme)
