Iha loron 17 fulan-Setembru tinan 2026, Embaixadóra Singapura nian Teo Lay Cheng vizita Klínika Maria Auxiliadora iha Venilale hodi observa diretamente serbisu husi misaun dentál ida husi Universidade Nasionál Singapura nian (NUS).
Misaun semana ida ne’ebé hala’o to’o 23 Setembru ne’e, halibur profisionál dentál seniór na’in 13 husi Singapura hodi fórnese fokit nehan emerjénsia, tratamentu preventivu no edukasaun ijiene orál ba labarik eskola oan sira 1,500 resin ho di’ak tebes.
Hanesan alumna NUS ida rasik, Embaixadór Teo apresia ekipa dentál ne’ebé voluntáriamente fó sira-nia tempu no matenek hodi serbí komunidade iha Timor-Leste. “Sira lori ona ekipamentu no sasan mediku sira ne’ebe karik la fasil atu hetan iha rai laran. Maibe importante liu mak ekipa ne’e mos lori koñesimentu, abilidade no esperiensia ne’ebe luan atu fahe ho komunidade,” nia hateten.
Hanoin hikas fali Primeiru-Ministru Lawrence Wong nia vizita mai Timor-Leste iha fulan-Jullu, vizita dahuluk husi Primeiru-Ministru Singapura ida, Embaixadóra Teo espresa importánsia atu hametin ligasaun husi povu-ba-povu, aleinde relasaun entre governu-ba-governu.
Nia espresa esperansa katak misaun susesu ne’e sei inspira ema Singapura barak liután atu kontribui ba Timor-Leste tuir sira-nia dalan rasik. “Esforsu hotu-hotu, boot ka ki’ik bele ajuda hakbesik Timor-Leste ba família ASEAN no hametin lasu entre ita-nia povu,” nia hateten.
Embaixadóra Teo mós agradese ba Irmán Saleziana sira ne’ebé fasilita voluntáriu sira-nia serbisu. Nia hatete “Ho ita-boot nia rede globál ne’ebé luan no servisu ne’ebé ema tau fiar ba imi, imi sai hanesan parseiru ideal ba misaun dentál ida ne’e. “Obrigada mós tanba tau matan ba ekipa ho di’ak tebes.”
Líder Misaun Dr. Eugene Loh hatete katak ekipa ne’e iha priviléjiu atu hetan apoiu husi klíniku-voluntáriu dentál seniór sira ne’ebé ho esperiénsia tinan barak iha misaun sira iha mundu tomak. Nia hatete “Iha misaun ida mai Timor-Leste ne’e, ami hetan sentidu ho realizasaun ida katak misaun dentál iha ne’e la’ós de’it kona-ba númeru nehan ne’ebé ami hasai ka aplikasaun sira ne’ebé ami halo.” Dr Loh hatutan tan “Komunidade lokál sira nia laran diak no ami-nia tradutór sira hotu servisu hamutuk ho ami hodi tau-matan ba pasiente sira. Esforsu kolaborativu ida-ne’e fó hanoin mai ami katak asaun kura ne’e sempre hanesan kolaborasaun ida ne’ebé ema esforsu hamutuk husi parte rua.”
Irmán Carolina Maria Correia, FMA, Diretora Komunidade St Mary Mazzarello iha Venilale, hateten misaun ne’e partikularmente signifikativu ba labarik sira ne’ebé hetan tratamentu.
“Karidade mak fuan ba ita-nia fiar. Benefisiáriu sira mak estudante sira ne’ebé presiza tratamentu orál, sira mak esperansa boot ba futuru. Sira mak razaun, no sira tenke sente katak sira hetan hadomi, hanoin-hetan no importante.”
Irmán Carolina mós simu Embaixadóra Teo nia vizita ba klínika, hodi hatete katak ida-ne’e hatudu ba labarik sira katak sira hetan kuidadu laos deit husi sira nia komunidade ne’ebé besik. “Imi nia prezensa iha ne’e halo momentu ida ne’e sai espesial liu tan. Hatudu imi nia domin, imi nia apoiu no imi nia besik ba povu Timor-Leste liuhusi povu Venilale,” nia hateten. “Ida-ne’e fó hanoin mai ita katak ita la mesak, no katak espíritu kompaixaun nian atravesa fronteira hotu-hotu no nasaun hotu-hotu.”
Misaun dentál NUS hanesan ezemplu ida kona-ba ligasaun entre ema-ba-ema ne’ebé buras entre Singapura no Timor-Leste, ho Singapura-oan sira fahe sira-nia tempu, perítu no rekursu sira hodi apoia komunidade sira iha Timor-Leste.
