DILI, STLTIMORLESTE.com – Enkaregadu Negosiu Interinu husi Embaixada Indonezia iha Timor Leste, Nugroho Aribhimo halo despedida ho Prezidente Republika (PR), Jose Ramos Horta iha Palasiu Prezidensial.
Bainhira remata hasoru malu, Enkaregadu Negosius Interinu husi Embaixada Indonezia iha Timor Leste, Nugroho Aribhimo ba jornalista sira iha Palasiu Prezidensial Nicolau Lobato, Bairo Pite, Kuarta lokraik (24/06/2026) hatete, ohin mai hasoru malu ho Prezidente Republika Jose Ramos Horta hodi halo despedida.
“Ohin mai halo audensia ho sua exelensia Prezidente Republika ho objetivu hodi halo despedida,” dehan Enkaregadu Negosius Interinu husi Embaixada Indonezia iha Timor-Leste.
Nia hatete, enkontru nee ho objetivu hanesan despedida ofisial husi diplomata nee nian, neebe sei remata ninia misaun tinan rua iha Dili iha Timor iha loron 1 fulan Julhu oin mai.
Iha sorumutu nee nia laran, Nugroho Aribhimo hatoo ninia agradesimentu klean ba apoiu, koordenasaun, no kooperasaun diak tebes neebe Governu no povu Timor-Leste fo durante ninia mandatu iha Timor Leste.
“Hau agradese no impresionadu tebes ho asistensia, koordenasaun, no kooperasaun neebe maka Governu Timor-Leste fo durante hau nia mandatu iha nee,” dehan nia.
Nugroho mos husu deskulpa ba erru ruma ka komentariu la ho intensaun neebe nia halo durante halao nia knaar neebe bele ofende parte ruma.
Nugroho tuir planu sei hakotu nia mandatu iha Timor Leste iha loron 01 fulan-jullu tinan 2026. Molok sai husi Díli, nia sei entrega nia knaar ba Banga Malewa, konselleiru ida iha Embaixada Indonezia nian iha Díli, neebe sei halao knaar nuudar Enkarregadu ba Negosiu Interinu.
“Nia sei halao knaar nuudar Enkarregadu Asuntu sira nian hafoin hau sai husi Díli. Hafoin nee, funsionariu superior ida ho grau husi Ministru Konselleiru provavelmente sei too hodi kontinua nia knaar sira too nomeasaun husi Embaixador foun ida ba Republika Indonezia nian”, nia esplika.
Tuir Nugroho, Governu Indonezia sei hein hela desizaun kona-ba nomeasaun ba embaixador foun mai Timor-Leste.
Taka ninia mandatu, Nugroho hatoo fila-fali nia apresiasaun ba governu no povu Timor-Leste ba kontinuasaun amizade no kooperasaun metin entre nasaun rua nee.
Reprezentasaun provizoria nee sei asegura kontinuidade serbisu nian no manutensaun ba relasaun bilateral metin neebe liga nasaun rua nee, enkuantu governu sira hein hela nomeasaun ofisial no xegada husi Embaixador Indonezia foun ba Timor-Leste.
Iha biban nee Prezidente Republika Jose Ramos Horta hatoo agradese ba Enkarregadu Negosius interinu husi Embaixada Indonezia iha Timor-Leste, Nugroho Aribhimo neebe durante serbisu hamutuk Governu iha Timor Leste, agaradese ba serbisu neebe halo ona hamutuk ho povu Timor Leste.
(eme)
