BAUCAU, STLTIMORLESTE.com – Eskola Sekundária Jerál (ESJ) Filial Dom Carlos Filipe Ximenes Belo, Quelicai Antigu, prepara estudante 38 ba ezame nasionál anu letivu 2026.
Koordenador ESJ Filial Dom Carlos Filipe Ximenes Belo, Carlos Ximenes Filipe hateten, eskola simu ona orientasaun husi Servisu Munisípal Edukasaun Baucau.
Orientasaun refere inklui formasaun komisaun no preparasaun fatin, matéria, no nesesidade sira seluk ba realizasaun ezame nasionál no lokál.
“Kada profesór elabora matéria, entrega ba seksaun verifikasaun, no hafoin verifikadu mak tama ba prosesu imprimisaun,” Carlos hateten ba STL iha resintu Servisu Munisípal Edukasaun Baucau, Kinta (01/10/2026).
Nia hateten, preparasaun estudante sira iha eskola atinji ona nivel masimu, liuliu hafoin eskola hetan profesór liuhusi kolokasaun Ministériu Edukasaun.
Aumentu númeru profesór permite eskola garante prosesu aprendizajen kada loron, inklui aula reforsa ba estudante finalista sira.
Estudante sira partisipa iha aula normál durante dadeer, enkuantu aula reforsa hala’o durante loraik atu haforsa preparasaun ezame.
“Aula reforsa liuliu ba matéria ezame nasionál, maibé matéria ezame lokál mós simu aula reforsa durante loraik.” Carlos komenta.
Carlos esplika, objetivu aula reforsa mak atu hakle’an komprensaun estudante sira ba matéria ezame, antes sira tama iha sala ezame.
Matéria ezame nasionál ne’ebé simu aula reforsa inklui Matemátika, Fízika, Kímika, Biolojia, Língua Tetum, Portugés no Inglés.
Ba organizasaun lokal ezame, estudante finalista 38 sei fahe ba sala tolu, tuir planeamentu ne’ebé eskola prepara ona, ne’ebé sei partisipa iha ezame anu letivu 2026.
Enkuantu, total profesór atualmente servisu iha eskola hamutuk na’in 8, kompostu Bolsu Kandidatu na’in 6 no permanente na’in 2.
(tom)
