DILI, STLTIMORLESTE.com – Eskola balun neebe mak lokaliza iha Munisipiu Bobonaro balun too agora seidauk asesu ba bee moos, no eletrisidade kobre daudaun ona iha eskola.
Lia hirak nee hatoo husi Miguel Freitas, hanesan Diretor Servisu Edukasaun Munisipiu Bobonaro ba STL liu husi telefone, Kuarta nee (19/08/2026) dehan, total sala aprendizajen hamutuk 300 resin.
“Los duni ita nian area remotas liga ba problema infraestrutura menus ona, tanba ita atu kobre hotu, konaba bee moos nee iha eskola ida rua nunee mak seidauk asesu ba bee moos, maibe iha parte barak mak kobre ona, ita nian konstrusaun ba eskola sira mos hahu lao daudaun ona, tanba foin daudaun husi UNICEF mak kria ninia konstrusaun, neebe mak agora daudaun lao hela,” katak nia.
Nia afirma, total eskola iha Munisipiu 234, nee husi edukasaun pre eskolar, ensinu baziku, sekundariu no tekniku vokasional, total profesores mil seiscentos quarenta oito, nee husi nivel eskolaridade.
“Ita nian kondisaun eskola iha area remotas nee balun diak ona, maibe balun seidauk diak, ba oin presiza aumenta sala, fasilidade profesores, ita presiza kria kondisaun no prepara fasilidade ba ita nian estudante sira,” nia esplika.
Nia hatutan, eletrisidade hahu kobre daudaun ona ba eskola sira iha area remotas, balun iha biblioteka, balun seidauk iha, se menus livrus, hodi bele fasilita estudantes sira iha prosesu ensinu aprendizajen, preparasaun profesores sira nian mak oinsa halo planu de aula molok hanorin estudantes sira.
“Bee moos, saneamentu no eletrisidade nee importante tebes, oinsa ita nian eskola sira nee bele asesu ba eletrisidade, bee moos, ita nian eskola sira nee distansia dook malu, maibe ho vontade sira nafatin ba eskola,” dehan nia.
Nunee mos Diretor Servisu Edukasaun Munisipiu Liquiça, Julio da Silva dehan, infraestrutura eskola balun hahu hadia, balun seidauk, aumenta sala de aula, fasilidade, livrus, asesu ba eletrisidade no bee moos.
(jac)
