DILI, STLTIMORLESTE.com – Maske uluk estudantes husi Eskola Sekundariu Jeral FINANTIL ho Eskola Sekundariu Jeral 10 Dezembru Comoro sai risku ba konflitu, maibe daudaun nee la akontese problema ruma husi eskola rua refere.
Haktuir Superintendente Edukasaun Munisípiu Dili, Cesarina C. Guterres ba STL iha nia knaar fatin, Tersa nee (28/07/2026).
“Ita nian eskola neebe sai risku ba konflitu. Uluk liu akontese iha eskola ESG 10 de Dezembro ho ESG FINANTIL, aibe agora ita haree konflitu ladun iha, laos la iha maibe provizoriamente agora daudaun la akontese problema ruma entre estudantes husi eskola 2 refere,” nia afirma.
Iha fatin seluk, Diretor ESJ 10 de Dezembro Comoro, Manuel Verdial hatete, uluk mak estudantes sira husi eskola rua nee hein malu iha dalan hodi hamosu problema, maibe agora ikus-ikus nee estudantes sira mai eskola partisipa iha aprendizajen, tanba sira mak jerasaun foun ba rai ida nee.
“Uluk mak ita nian estudantes sira husi eskola rua nee hein malu iha dalan hodi hamosu problema, maibe agora ikus-ikus nee estudantes sira mai eskola partisipa iha aprendizajen, tanba sira mak jerasaun foun ba rai ida nee,” nia afirma.
Manuel dehan, uluk nee estudantes husi eskola rua nee sempre hein malu iha parte estrada ninin, agora laiha tanba sira idak-idak mai iha eskola, ho objetivu atu partisipa iha aula, laos mai eskola atu provoka malu iha dalan, nee lae, nuudar estudantes mai eskola para atu aprende hodi prepara sai estudantes neebe diak iha futuru.
“Uluk nee ita nian estudantes husi eskola rua nee sempre hein malu iha parte estrada ninin, agora laiha tanba sira ida-idak mai iha eskola, ho objetivu atu partisipa iha aula, laos mai eskola atu provoka malu iha dalan, nee lae, nuudar estudantes mai eskola para atu aprende, hodi prepara sai estudantes neebe diak iha futuru,” nia esplika.
Nia dehan, nee duni nafatin fo hanoin ba estudantes sira katak, sai husi uma mai eskola nee atu aprende buat ruma no esforsu aan estuda, tanba estudantes sira mak sai futuru ba rai ida nee nian, sai labarik neebe mak susesu nee liu husi dalan mak tenke prepara aan ba estuda, familia liu-liu inan aman presiza halo kontrola oan.
“Atu sai labarik neebe mak susesu, primeiru tenke hakaas aan estuda no ita nian manorin sira hanorin ita boot sira tuir orariu neebe mak iha ona, tanba sira hakarak prepara ita nian estudantes sira sai labarik neebe susesu diak liu tan iha futuru, ita husu inan aman atu bele halo kontrola ba sira nia oan,” nia informa.
Iha fatin seluk, Diretor Eskola Sekundariu Jeral no 4 de Setembro Balide, Sergio A. da Cruz dehan, uluk estudantes husi eskola rua Nobel da Paz no ninia eskola rasik, estudantes sira hein malu estrada, depois tuda malu, maibe agora laiha.
“Uluk nee ita nian estudantes husi eskola rua Nobel da Paz no hau nian eskola rasik, estudantes sira hein malu estrada, depois tuda malu, maibe agora laiha,” nia informa.
Entretantu Diretor Eskola Nobel da Paz, Jeremias P. de Jesus hatete, nia sei konvida Diretor ESJ no 4 de Setembro Balide hodi koalia konaba asuntu ida nee, atu nunee ba futuru estudantes husi eskola rua nee evita problema, liu-liu bainhira sai husi eskola hein malu iha dalan.
“Hau sei konvida ita nian Diretor ESJ no 4 de Setembro Balide hodi koalia konaba asuntu ida nee, atu nunee ba futuru ita nian estudantes husi eskola rua nee evita problema, liu-liu bainhira sai husi eskola sira hein malu iha dalan,” nia dehan.
(jac)
