DILI, STLTIMORLESTE.com – Inan aman husi estudante balun husu ba eskola, presiza halo kontrolu ba vendedor sira neebe faan sasan iha areador eskola nian atu faan sasan neebe diak no kualidade, nunee labele prejudika moras ba labarik estudante sira.
Inan aman husi estudante balun lamenta ho sira nia oan nia situasaun bainhira han sasan neebe sosa iha areador eskola nian, fila bá uma moras hanesan mear, kabun moras no seluk tan. Nunee sira husu ba parte eskola atu kontrola vendedor sira neebe faan sasan sira, faan tenki diak no kualidade. Hanesan es, tau susu been barak para labarik sira labele kabun moras.
Tuir João do Rego nudar aman husi Estudante EBF 12 de Outobru hatete, eskola EBF sira presiza halo kontrolu bá tia vendedor sira neebe faan sasan iha areador eskola nian. Tanba sasan balun sira halo ladun diak bele halo labarik sira kabun moras. Hanesan es sira nee, sira kahur tau susu been ladun barak hemu bá hanesan hela bee mos, ida nee mak fo moras bá labarik sira nee. Nunee mos bá dosi no aifuan sira labele loke hela deit halo lalar no rai rahun sae tiha mak labarik sira sosa, neemos fo moras bá labarik sira. Buat sira hanesan nee eakola presiza halo kontrolu bá vendedor sira hodi fo hanoin, selae labarik sira moras labele tuir ona aula.
“Bainhira hau mai hein hau nia oan iha eskola, buat neebe hau fai matan liu mak sasan neebe Tia vendedor sira faan iha eskola nee. Tanba balun nia es tau ho susuben, maibe labarik sira han la senti susu ben nia gostu, tanba susu ben tau la barak. Ida nee bele halo labarik sira nia kabun moras. Nunee mos bá dosi no aifuan sira, tau nakloke deit lalar no rairahun semo bá iha sasan leten, neemak labarik sira sosa bá han, bele halo sira moras. Nudar inan aman estudante, husu parte eskola mak presiza halo kontrola no fo hanoin bá vendedor sira, atu nunee labele fo moras ba oan kiik sira. Bainhira sira moras sei la tama eskola,” dehan nia bá STL iha Tasi-Tolu, Tersa (13/06/2026).
Nia hatete, eskola labele husik sira faan livre no tuir sira nia hakarak. Tanba ema neebe atu sofre bá moras husi sasan neebe sira faan neemak estudante husi eskola ida nee nian, tanba nee presiza halo kontrolu bá vendedor sira nia sasan.
Nunee mos Inan Merita Soares, senti triste haree vendedor sira faan la ho hijene, hanoin deit mak hetan osan. Sasan neebe faan la taka ho diak, depois es no es campur tau susu ben la barak, no sasan plastik balun liu prazu, neemak halo labarik balun han hodi hetan moras. Neemak eskola mak tenke kontrola vendedor sira neebe ba faan sasan iha areadores eskola nian.
Entertantu Koordenador EBF 12 de Outobru, Fernando Barreto dehan, nee hanesan hanoin no sujestaun diak husi inan aman sira, atu nunee bele prevene labarik sira husi moras saida deit. Iha eskola ida nee, vendedor hirak neebe faan iha areador eskola nian nee kada loron fo 0,50 sentavos too fulan US$ 20 bá eskola ho sira nia assinatura, no osan nee hodi selu fali pesoal seguransa eskola nian hodi tau matan bá estudante sira durante iha eskola.
Nia hatutan, iha nee koordenasaun entre eskola ho vendedor sira lao diak, so atu kontrola sira nia sasan neemak dala ruma hasee liu deit, maibe ba oin eskola sei fo hanoin nafatin bá sira atu faan sasan neebe diak i kualidade bá estudante sira.
(dom)
