DILI, STLTIMORLESTE.com – Eskola Sekundária Jerál Públika 5 de Maio Becora sei uza osan Konsesaun Eskolar ba nesesidade administrasaun, ezame nasional, ezame lokal, ezame pasajen klase no atividade eskolar seluk, bainhira osan ne’e tama.
Diretór Eskola Sekundária Jerál Públika 5 de Maio Becora, Julio Maia Castro de Jesus, hato’o informasaun ne’e ba STL, Kuarta nee (09/09/2026).
“Konaba Konsesaun Eskolar, to’o agora seidauk iha informasaun, nune’e osan refere seidauk tama. Maibé bainhira osan ne’e sai, ami sei koloka ba administrasaun, atividade ezame nasional, ezame lokal, ezame pasajen klase. Restu ami sei rezolve konaba atividade eskola no renova fali klase sira ne’ebé presiza hadia,” dehan nia.
Nia hatutan, to’o agora eskola seidauk simu informasaun kona-ba Konsesaun Eskolar, tanba osan ne’e sei mai husi Ministeriu Edukasaun (ME) nu’udar apoiu ba eskola sira, atu kada eskola bele ezekuta osan tuir nesesidade no prioridade.
Iha sorin seluk, Diretór Eskola Sekundária Jerál Públika 12 de Novembro, Marculino Menezes Babo, dehan Konsesaun Eskolar mos seidauk tama. Maibé, tuir informasaun husi ME, prosesu osan ne’e ba banku.
“Konsesaun Eskolar seidauk tama. Maibé husi ME katak iha ona prosesu finansas ba banku. ME informa dehan hein tan semana ida. To’o semana ida karik seidauk tama, mak ita bele konfirma fali osan ne’e,” nia esplika.
Nia hatete, bainhira osan ne’e tama, eskola sei uza ba ezame nasional, ezame pasajen klase no asuntu administrasaun eskolar, tanba ezame nasional sei akontese iha loron 19 fulan Outubru tinan oin.
“Maske Konsesaun Eskolar seidauk tama, maibé ami husi eskola nee hein deit, tanba ho informasaun husi ME husu eskola sira hein deit. Asuntu KE agora dadaun ninia prosesu lao hela, hodi hein atribui osan ne’e ba ita-nia eskola sira atu bele uza tuir nesesidade eskola nian,” nia informa.
Nia hatutan, bainhira eskola sira uza osan ne’e, presiza halo mós relatóriu ba ME, atu bele hetan fali osan iha faze sira tuir mai. Ida ne’e tanba iha informasaun katak eskola balun foin hatama sira-nia relatóriu primeira faze.
(jac)
