DILI, STLTIMORLESTE.com – Espana konsege halakon Portugal ho rezultadu 1-0 iha jogu 16 boot Kopa Mundial 2026 iha Dallas Stadium, Texas, iha loron 7 fulan Julhu tinan nee, neebe lori Cristiano Ronaldo ba tanis no hamosu sentimentu tristeza ka laran kanek ba adeptu sira iha mundu tomak.
Iha momentu neebe refere, Cristiano Ronaldo lakon kontrolu ba ninia emosaun bainhira final apitu ho rezultadu derrota. Nia tanis ho laran kanek bainhira foti fali mehi atu lori fali Portugal ba titlu, no imajen nee hatudu katak ba nia, jogu Ida nee laos deit kompetisaun, maibe sakrefisiu boot ida ba nasaun. Tanis husi Kapitaun nee nuudar simblu husi frustasaun neebe komun ba jogador sira hotu neebe lakon oportunidade iha Kopa Mundial.
Golu uniku husi partida nee marka husi Mikel Merino iha minutu 90+1, neebe book ekipa Espana hodi hakat liu faze 16 boot. Ho rezultadu nee, Portugal termina sira nia viajen iha torneiu nee.
Iha parte seluk rezultadu nee lori tristeza neebe boot ba adeptu Portugal sira, liuliu Jose de Araujo neebe akompanha jogu nee ho esperansa boot. Ba Jose derrota nee hanesan susar tebes atu simu, tanba nia fiar katak ekipa nee iha kualidade atu avansa ba faze tuir mai. Sentidu lakon nee sai kman liu tan tanba golu neebe Espana hatama iha minutu ikus, neebe hapara duni mehi husi adeptu sira atu haree sira nia idolu kontinua jogu iha Kopa Mundial.
“Hau senti triste tebes bainhira haree ekipa Portugal lakon iha minutu ikus sira nia laran. Nuudar adeptu ida, susar tebes atu simu rezultadu nee, tanba ami hakarak tebes atu haree sira kontinua lori naran rai Portugal ba oin iha etapa sira tuir mai. Derrota ida nee lori sentimentu laran triste, maibe nee parte ida husi desportu neebe dala barak fo emosaun neebe labele esplika,” hatete Jose ba STL, Tersa nee (07/07/2026).
Nia dehan, maski derrota nee moruk atu simu, nia sei kontinua fo apoiu ba ekipa nee iha futuru. Tuir nia, futebol mak mundu ida neebe hatudu sirkuntasia hotu hotu, tan nee nia prontu atu foti lisaun husi rezultadu nee, no hein katak iha treinu tuir mai, Portugal bele mai ho forsa neebe boot liu tan hodi foti fali rezultadu neebe diak.
Aleinde nee, rezultadu derrota nee hamosu reasaun oioin iha media sosial, liuliu iha Facebook. Adeptu Portugal ho haters sira hatoo komentariu oioin, no hateres sira kritika makas ekipa Portugal nia performa iha kampu laran. Komentariu balu ho lian makas sai nuudar buat neebe dominante iha espasu virtual, neebe refleta tensaun no frustrasaun husi adeptu sira hafoin ekipa neebe sira apoia lakon iha momentu kritiku.
(car)
