DILI, STLTIMORLESTE.com — Selesaun nasional Espana ba dala ruak iha istoria foti trofeu Kopa Mundial FIFA 2026 nuudar kampiaun mundial, hafoin halakon selesaun nasional Argentina ho skor 1-0 iha jogu final neebe ho tensaun aas iha Estadiu New York New Jersey, Domingu (19/07/2026).
Golu mesak neebe determina vitoria Espana nian hetan husi avansadu Ferran Torres iha minutu ba 106 iha tempu ekstra (extra time), hafoin simu pasajen bola husi Nico Williams iha oin lina defensivu Argentina nian.
Iha jogu tempu regulamentar minutu 90 nia laran, ekipa rua hatudu konfrontasaun taktika neebe kian tebes.
Espana domina posesaun bola no kontrola lina klaru, enkuantu Argentina uza estratejia defensiva ho kontra atake neebe dirije husi kapitaun Lionel Messi.
Tensaun jogu nian sae makaas iha minutu ikus tempu regulamentar (90+3′) hafoin meiu-kampista Argentina Enzo Fernández simu kartaun amarelu ba dala ruak, no hetan kartaun vermelhu husi arbitru. Desizaun nee halo Argentina tenke kontinua fali jogu tempu ekstra ho deit jogador nain 10.
Aproveita vantajen jogador, Espana hatudu presaun forte too ikus mai Ferran Torres, konsege suta bola tama ba rede neebe guarda husi Emiliano Martínez. Maski Argentina tenta buka golu lalais iha minutu balun neebe resta, defensivu Espana mantein posisaun metin too apitu ikus.
Vitoria nee marka titulu Kopa Mundiáa ba da-ruak ba Espana hafoin tinan 2010. Susesu nee iha tempu nee duni hametin dominasaun futebol Espana nian iha nivel internasional, hafoin ekipa feto Espana nian mos foti tiha trofeu kampiaun Kopa Mundial Feto iha tinan 2023.
Iha fatin seluk, adeptu selesaun Argentina iha Timor-Leste, Rodolfo da Silva, espresa nia triste boot maibe aseita ho fuan ksolok ba reultadu jogu nee. Maski sente oituan triste ho lakon nee, nia nafatin foti oho ba esforsu boot neebe hatudu husi ekipa Albiceleste too minutu ikus tempu ekstra nian.
“Nuudar adeptu, klaru katak triste tebes tanba foin lakon iha minutu ikus sira ho jogador na’in 10 deit. Maibe ami orgulhu ho fuan brani neebe Lionel Messi no kolega sira hatudu iha mehi boot nee. Parabsns ba Espana, no Argentina sei fili fali ho forte liutan,” dehan Rodolfo ho sentimentu Triste ba STL, iha Dili, Segunda (20/07/2026).
Nia hatutan, derrota iha final nee la hamate sirania domin ba selesaun nian, tanba ekipa kor mutin no azul-selete nee hatudu ona spiritu ho brani boot iha kompetisaun final Kopa Mundial.
“Iha futebol naran derrota ho vitoria nee buat baibain tebes. Lakon ohin nee laos signifika ami lakon esperansa, maibe nee sai lisaun boot ida hodi forma fali ekipa neebe ho kualidade aas liutan iha kompetisaun oin mai,” hatutan Rodolfo.
Entretantu, ho jogu nee halo adeptu sira halo komentariu barak no fahe sira nia sentimentu iha media sosial sira husi Facebook, TikTok, no plataforma seluk tan. Publika sira neebe mak barak iha redes sosiais hatudu opiniaun oioin, husi parabens ba susesu Espana nian, too mensajen apoiu ho sentimentu brani ba selesaun Argentina neebe hatudu ona jogu aas iha mehi final nee.
(car)
