ERMERA, STLTIMORLESTE.com – Lia fuan ka slogan “Esperansa La Bosok,” neebe pronunsia iha loron lansa primeiru pedra ba projetu estrada iha Ermera agora sai fali buat neebe ironik tebes. Bainhira serimonia boot halao ho detallu neebe luxu, povu Ermera hein katak dezenvolvimentu nee sei lori mudansa signifikativu ba asesu infraestrutura nian. Maibe realidade iha terrenu hatudu buat neebe diferente tebes, estrada neebe promete atu sai dalan ba progresu, agora sai fali fatin neebe kareta sira dahur tanba nakonu ho tahu.
Iha momentu neeba ukun nain sira mos promete katak dezenvolvimentu nee sei lori mudansa ba povu, hodi fasilita movimentu produtu agrikola no lori moris diak ba komunidade Gleno no Letefoho. Maibe ohin loron esperansa la bosok nee, ikus mai sai fali dezafiu neebe moras. Tanba realidade hatudu katak estrada neebe dehan sei halo ho kualidade, agora sai deit fatin tatidik no dahur ba kareta sira.
Situasaun ida nee laos deit kona-ba udan been neebe boot, maibe nee mak ezemplu ka espelhu husi kualidade projetu no fiskalizasaun neebe fraku. Bainhira serimonia primeiru pedra realiza ho festivu ema haree hahalok ida neebe fokus liu ba simblu politiku duke substansia teknika, rezultadu mak nee projetu lansa maibe estrada tahu dodok nafatin, komunidade mak sai vitima, no osan publiku sai ba rai mamuk.
Nunee povu Ermera la presiza serimona primeiru pedra neebe nakonu ho lia fuan furak maibe ikus mai kareta dahur iha tahu laran. Povu presiza estrada ida neebe sira bele uza hodi lori sira nia produtu ba merkadu ho seguru. Wainhira estrada neebe sai tahu nurak nee laos deit impede movimentasaun, maibe impede mos dezenvolvimentu ekonomia lokal.
Tanba definitivamente dezenvolvimentu laos buat neebe halo ho lian deit. Maski slogan nee temi esperansa la bosok realidade projetu nee sai fali esperansa neebe bosok, tanba estrada dodok no aat ba bebeik, entaun ukun nain sira tenki prontu atu simu kritika. Povu Ermera sei kontinua hein ba asaun neebe konkreta hodi hadia estrada, tanba estrada neebe nakonu ho tahu laos sinal ba dezenvolvimentu, maibe sinal neebe la kumpri promesa.
Enkuantu Ermera nuudar Munisipiu ida neebe depende makas ba transporte sasan agrikola sente duni impaktu estrada neebe tahu dodok nafatin. Tanba iha momentu lansa projetu ukun nain sira dehan Ermera sei sai ona husi izolamentu, maibe realidade hatudu estrada neebe foin lansa deit, udan been monu halo dalan sira nee sai fali fatin neebe perigu ba tranporte publiku no privada.
Kondisaun estrada neebe tahu dodok nafatin hamosu reasaun husi komunidade Ermera sira neebe loron kalan hasoru difikuldade.” Ami la kohi ona rona lia fuan furak sira nee. Se estrada tahu nurak katak esperansa la bosok, nee bosok duni. Governu tenke mai haree ami nia susar, laos deit mai halo lansamentu,”hatete Komunidade Ermera, Marcos Soares ba STL, iha Gleno, Sabadu (25/04/2026).
Komentariu nee hatudu katak povu Ermera laos deit laran kanek, maibe kestiona integridade lian husi esperansa la bosok neebe Governu uza.“Se hakarak prova katak sira nia esperansa la bosok nee loos, agora mak tempu atu hadia estrada neebe tahu dodok no asegura katak kompanhia sira servisu tuir kualidade,” hatete komunidade nee.
Maibe ba Marcos estrada neebe metin mak esperansa neebe loos, laos lia fuan furak iha palku neebe naksobu hamutuk ho udan been, iha Munisipiu Ermera.
Entretantu iha loron 26 fulan Janeiru tinan 2026 Governu lansa projetu reabilitasaun estrada urbana Gleno no estrada neebe liga Gleno ba Postu Administrativu Letefoho. Projetu ho kustu milhaun US$ 38,8 resin, neebe implementa husi China Civil Engineering Construction Corporation (China).
(car)
