BAUCAU, STLTIMORLESTE.com – Planu konstrusaun edifísiu no estabelesimentu Postu Korpu Bombeiru iha Postu Administrativu Quelicai, Munisípiu Baucau, sei hein prosesu iha nasionál.
Komandante Operasaun Autoridade Protesaun Sivíl Munisípiu Baucau, Francisco Viana Freitas rekoñese katak, iha tinan kotuk liuhusi vizita ofisiál Autoridade Protesaun Sivíl Nasionál ba edifísiu Korpu Bombeiru Munisípiu Baucau, parte munisípal aprezenta ona nesesidade atu estabelese membru Korpu Bombeiru iha nivel Postu Administrativu.
Nia hateten katak, estabelesimentu ne’e importante atu responde lalais ba situasaun emerjénsia, liuliu insendiu, iha área ne’ebé distánsia dook husi sentru Munisípiu Baucau.
“Iha Baucau identifika ona fatin balu iha Quelicai atu monta Postu Bombeiru ida, maibé ita sei hein nia prosesu sei la’o hela. Bainhira mak monta iha ne’ebá, ita sei hein prosesu,” hateten Francisco ba jornalista sira iha nia knaar-fatin iha Tirilolo, Baucau Vila, Kinta (10/09/2026).
Nia esplika katak, planu estabelese Postu Korpu Bombeiru la signifika katak kada Postu Administrativu tenke iha Postu Bombeiru rasik. Ba Munisípiu Baucau, Quelicai mak sai prioridade tanba konsidera nia área luan, liuliu iha área foho ne’ebé bainhira akontese insendiu, ekipa Bombeiru husi Baucau presiza tempu naruk atu to’o no kombate ahi.
“Objetivu monta Bombeiru iha ne’ebá tanba área ne’ebá luan. Bainhira akontese insendiu, bele kombate insendiu tanba ita husi Baucau distánsia dook. Entaun tau iha ne’ebá hodi halo primeira intervensaun antes ekipa husi Baucau avansa,” Francisco akresenta.
Nia informa katak, kona-ba fatin atu estabelese Postu Korpu Bombeiru iha Quelicai, Autoridade Protesaun Sivíl Munisípiu Baucau halo ona koordenasaun ho Autoridade Postu Administrativu no lideransa Suku sira, hatudu ona fatin.
Prosesu no proposta kona-ba estabelesimentu Postu Bombeiru iha Quelicai relata ona ba Autoridade Protesaun Sivíl Nasionál, atual parte munisípal hein desizaun husi nivel nasionál atu bele kontinua ba implementasaun.
Francisco mós komenta katak, polítika estabelese Postu Korpu Bombeiru iha nivel Postu Administrativu sira ona hahú, tanba iha Munisípiu seluk, hanesan Viqueque, Manatuto, Lautém inklui munisípiu seluk implementa ona, maibé iha Munisípiu Baucau planu refere seidauk realiza.
“Presizamente tenke aselera prosesu ne’e, maibé ne’e kna’ar iha nivel nasionál. Tanba planu ami hatama hotu ona, hein de’it desizaun husi nasionál,” Francisco subliña.
Estabelesimentu Postu Korpu Bombeiru iha Quelicai sei sai parte husi esforsu atu aproxima servisu resposta emerjénsia ba komunidade, liuliu iha área ne’ebé durante ne’e depende ba ekipa Bombeiru husi sentru Munisípiu Baucau.
(tom)
