DILI, STLTIMORLESTE.com — Deputadu husi Bankada FRETILIN iha Parlamentu Nasional, Antoninho Doutel Sarmento hateten katak, Estadu Republika Demokratika Timor Leste (RDTL) sosa ho sakrifísiu boot husi povu Maubere, maibe nia kestiona hahalok ukun nain sira neebe kaer poder ohin loron, tanba fo prioridade liu ba osan no tolera pratika korrupasaun.
Tuir Antoninho, reallidade hatudu katak ema neebe kaer poder hatudu tendensia boot ba pratika korrupasaun, duke fo atensaun ba kualidade obra no fornesimentu sira ba instituisaun estadu nian.
“Estadu nee sosa ho sakrifísiu povu Maubere nian, maibe ohin loron ema neebe kaer podée prioriza liu osan no hateke de’it ba korrupasaun, duke fo atensaun ba kualidade obra no fornesimentu sira ba instituisaun estratejika sira ne’e,” dehan Deputadu Antoninho ba STL liu husi WhatsApp, Sesta nee (21/08/2026).
Deputadu nee hatutan katak, kestionamentu nee akontese kuaze iha fatin no setor hotu-hotu iha rai laran, neebe fo impaktu negativu ba dezenvolvimentu nasional no benefísiu diretu ba populasaun.
Nia husu ba governu no entidada kompetente sira atu foti medida neebe seriu hodi kontrola kualidade projetu sira no garante transparensia, atu nune’e rekursu estadu nian bele fahe ho loloos ba nesesidade povu nian.
Iha parte ketak, Observador Polítika, José da Silva, hateten katak preokupasaun husi bankada opozisaun nee sai hanesan sinaal ida, atu hatudu katak sistema supervizaun ba projetu publiku sira sei fraku no presiza reformasaun neebe ho rigorozu.
Nia subliba katak bainhira estadu la fo prioridade ba kualidade obra, impaktu aat nee sei lori todan liu ba povu kbiit-laek neebe depende tomak ba infrastrutura no servisu publiku sira nee.
“Tan nee, ita presiza hamutuk hodi fo atensaun ba jestaun rekursu publiku sira no husu responsabilidade neebe klean husi ukun nain sira, atu nunee sakrifísiu neebe povu fo ba estadu nee la sai ba leet no bele lori naroman ba jerasaun hotu-hotu,”dehan nia.
Entretantu, Akademista husi Universidade Paz (UNPAZ), Januário de Araújo, sublina katak presiza duni ezekuta kontrolu sosial neebe ho rigorozu ba jestaun rekursu publiku sira.
Nia afirma katak, papel kontrolu husi sosiedade sivil no akademiku sira sei sai fator xave ida hodi husu transparénsia no responsabilidade husi ukun nain sira, atu nunee sakrifísiu estadu nian bele lori duni benefísiu ba populasaun tomak.
(car)
