DILI, STLTIMORLESTE.com – Kondisaun infraestrutura neebe seidauk diak, liu-liu estrada liga ba munisipu sira sai mos hanesan dezafiu boot neebe halo osan husi Timor Leste kontinua semo ba rai liur. Tanba kustu transporte neebe aas, produtu lokal husi foho labele kompete ho sasan importasaun neebe tama husi fronteira.
Iha segunda nee observasaun jornalista STL iha merkadu Taibesi haree katak, porsentu 70 husi produtu hortikultura hanesan modo tahan, tomate, ai manas, lis no senora mai husi rai liur. Enkuantu produtu husi agrikultor sira iha Aileu, Ainaro, Ermera no seluk tan menus iha kantu merkadu nian.
“Ami hakarak sosa modo lokal, maibe nia folin karun liu tanba tula husi foho mai nee gazolina karun no estrada aat halo karreta mos estraga, ikus mai ami sosa deit sasan sira neebe mai husi rai liur tanba baratu liu,” dehan Martinha de Araújo konsumidor ida ba STL, iha Taibesi, Díli, Segunda (30/03/2026).
Situsaun nee kria sirkulasaun ekonomia ida neebe ladiak, osan neebe lojika tenke sirkula iha agrikultor sira nia leet, ikus mai sulin fali ba importador sira neebe sosa sasan husi rai liur ka Tasi balu. Ida nee halo dezenvolvimentu iha baze kontinua lao neneik maski osan Estadu nian sirkula hela liuhusi salariu.
Observador Ekonomia, Jacinto de Carvalho fo hanoin katak, se governu la hadia lalais estrada rural no la fo subsidiu ba transporte produtu lokal, Timor-Leste (TL) sei sai deit nuudar merkadu ba nasaun vizinu sira, enkuantu riku soi iha rai laran kontinua lakon ka sulin hotu ba rai liur.
(car)
