BAUKAU, STLTIMORLESTE.com – Estrada diresuan husi Postu Baguia Vila ba Suku 3 durante tinan 24 hela ho kondisaun aat no kauk, dadaun nee estrada kotu rezulta produtu lokal dodok deit iha toos laran hamate rendimentu ekonomia familia.
Xefe Suku Ossohuna, Paulo dos Reis Piedade aprezenta, estrada diresaun husi Postu Baguia Vila ba Suku 3 hanesan Suku Afaloikai, Ossohuna no Haekoni iha Postu Administrativu Baguia, Munisipiu Baukau ho distansia kilometru 10 resin no fo asesu ba komunidade hamutuk nain 7.745 kompostu Suku Afaloikai ho populasaun hamutuk nain 1.639, Alawa Kraik nain 1.934, Haekoni nain 2.807 no Ossohuna iha populasaun hamutuk nain 1.365, maibe durante tinan 24 iha faze ukun aan, komunidade sira sofre kondisaun estrada aat, tanba seidauk hetan atensaun husi Ministeriu Obras Publikas (MOP).
“Husi Baguia Vila ba fila fali Suku 3 nee mos agora motor liu la diak ona, tanba dalan klean hotu tiha ona, udan boot bee estraga agora tahu sae makaas kuak iha fatin fatin,” Xefe Suku Ossohuna Paulo dos Reis Piedade hateten ba jornalista sira iha Vila Antiga Baukau, Tersa (28/04/2026)
Nia sublinha, estrada atual diresaun husi Baguia Vila ba Suku 3 refere konstrui iha tempu Indonezia iha neebe laiha valeta atu kanaliza udan been durante tempu udan sira, nunee husi udan been rezulta estrada refere afeta ba kondisaun aat no dadaun risku ba transporte publiku sira atu too iha area refere tula pasajeiru, tanba estrada kuak barak.
Nia fundamenta, aat liu tan mak udan boot neebe akontese iha loron 25-26 Abril nee, rezulta estrada diresaun refere kotu total iha mota Aldeia Basaharawai, Suku Haekoni labele fasilita ona komunidade agrikultores husi Suku Ossohuna no Afaloikai labele lori sai produtu lokal ba merkadu Postu no Munisipal, inklui estudante sira husi Suku Haekoni labele atu hakat utrapasa ba tuir prosesu aprendizajen iha eskola Ensinu Baziku Ossohuna no eskola Ensinu Sekundaria Ossohuna, tanba kauza husi inundasaun refere afeta ba rai naruk no klean.
“Nia kotu liu metru 4, karreta labele liu, pasajeiru sira lao ain distansia kilometru 5 resin mak too iha Haekoni foin asesu transporte publiku,” Paulo dos Reis Piedade aprezenta.
Nia deklara, Suku Haekoni, Ossohuna no Afaloikai mak Suku neebe eziste iha Postu Administrativu Baguia riku ho produtu lokal hanesan koto, fehuk, talas, fehuk ropa no seluk tan, neebe sai fonte rendimentu ba komunidade sira iha suku refere inisiu kedas husi tempu okupasaun Indonezia too ohin loron.
Maibe durante nee kondisaun estrada aat no kuak afeta ba komunidade agrikultores sira iha Suku 3 refere, tanba produtu lokal neebe sira produz iha toos laran rezultadu labele asesu ba merkadu.
“Produtu lokal iha neeba barak, mais labele tuun tanba dalan sae ba araska, entaun kada tinan komunidade sira nia produtu sempre estragus,” Paulo dos Reis Piedade informa.
Autoridade Suku Ossohuna nee aprezenta, relasiona kondisaun estrada refere, Autoridade Suku sira hotu iha Postu Baguia reforsa proposta ida ba Instituto Jestaun Ekipamentus Apoiu Dezenvolvimentu Infraestrutura (IGEADI) atu halo manutensaun ba estrada refere, maibe seidauk iha rezultadu, tanba seidauk ba halo manutensaun ba estrada refere.
Maibe iha tinan nee, Prezidente Autoridade Munisipiu Baukau, Veneranda Lemos rasik tuun direita haree no observa ona kondisaun estrada refere, iha neebe konsidera aat no grave prezisa atensaun husu Governu Sentral, tanba aleinde Suku 3 iha potensialidade ba produtu lokal, estrada refere mos kategaria estrada nasional neebe nia halo koneksaun ba Postu Administrativu Watulari no Watukarbau, Munisipiu Vikeke.
“Prezisa duni hadia, tanba ita nia komunidade sira iha neeba faan produtu lokal nee mak hetan osan selu oan sira nia eskola,” Paulo dos Reis Piedade komenta.
Entretantu too notisia nee publika, STL seidauk hetan konfirmasaun husi Servisu Munisipal Obras Publikas Baukau, tanba okupadu.
(tom)
