DILI, STLTIMORLESTE.com – Estrada diresaun husi Suku Serlau ba Suku Baduro iha Postu Administrativu Lautem, Munisipiu Lautem, distansia kilometru (Km) 15, atualidade kondisaun aat, iha neebe difikulta komunidade sira nia movimentasaun.
Xefe Suku, Baduro Faustino Dias Almeida aprezenta, estrada refere konstrui iha tempu okupasaun Indonezia ho mini alkatraun, maibe agora aat tanba utiliza ona durante tinan barak no laiha sistema drenajen hanesan valeta.
“Estrada ba Suku Baduro Km 15 agora aat la halimar, tanba estrada nee uluk tempu Indonezia tau alkatraun kasar, maibe valeta laiha, entaun estrada husi Puimau too leten nee aat total,” hateten Faustino ba STL liu husi telefone, Tersa (26/05/2026).
Nia esplika tan katak, durante tempu udan kondisaun estrada sai todan liu tanba rai kois no tahu barak, neebe difikulta transporte publiku no privadu atu halo movimentasaun normal, tanba iha tempu udan movimentasaun transporte ba viajem husi diresaun refere para total.
Nia salienta, problema estrada nee la afeta deit komunidade Suku Baduro, maibe afeta mos komunidade sira iha suku vizinhu hanesan Maina Primeiru, Maina Segundu no Serlau.
“Kondisaun estrada nee ami suku hira nee hamutuk hatoo ona ba Ministeriu Obras Publikas, maibe too agora seidauk iha resposta ruma,” nia komenta.
Autoridade Suku Baduro husu Ministeriu Obras Publikas hadia estrada refere, nunee bele fasilita movimentasaun transporte publiku no privadu neebe fasilita komunidade sira asesu ba merkadu no servisu sira seluk.
Enkuantu too notisia nee publika, STL seidauk hetan konfirmasaun husi Servisu Munisipal Obras Publikas Lautem.
Entretantu, Suku Baduro iha Aldeia lima, mak Malailada, Irpala, Lua-Dau, Tamaro no Lakulmonu, ho populasaun hamutuk ema nain 1.870.
(tom)
