DILI, STLTIMORLESTE.com – Dezenvolvimentu laos deit sukat ho estrada diak, maibe Governu tenke fo prioridade mos ba povu kiak sira ne’ebe sei moris ho susar no rendimentu kiik iha baze.
Observador Ekonomia , Luciano de Araujo hatete ba STL iha Dili, Kinta nee (10/09/2026) hatete katak, dezenvolvimentu laos haree deit ba estrada, maibe tenke haree mos ba povu nia moris.
“Se Governu fo prioridade boot ba estrada no projetu sira, ita tenki mos haree ba moris loroloron povu, liuliu família sira ne’ebé moris susar no ho osan menus. Tanba dezenvolvimentu la’ós estrada no edifísiu de’it,” dehan Luciano.
Nia hatutan, Governu tenke fo atensaun boot ba nesesidade baziku povu nian.
“Governu tenki ajuda povu atu hetan ai-han ho folin ne’ebé bele sosa, kria empregu, ajuda agrikultór sira, hadi’a saúde no eskola, garante bee moos, no ajuda família kiak atu moris ho di’ak liután,” tenik nia.
Tuir Luciano, bainhira povu sei hasoru hamlaha, laiha serbisu no asesu limitadu ba bee moos no saude, estrada diak ne’ebe harii sei la fo impaktu boot ba moris povu nian.
Tanba ne’e nia sujere ba Governu atu fahe orsamentu ho balansu, laos deit ba infrastrutura maibe mos ba setor sosial no produtivu atu povu hotu bele sente dezenvolvimentu.
Iha parte ketak, Akademista UNTL , Antonio da Silva konkorda ho opiniaun ne’e, no hatete katak dezenvolvimentu tenke foku ba ema.
“Dezenvolvimentu lolos ne’e ema mak sentru, laos projetu. Se ita halo estrada barak maibe povu sei kiak, labarik barak sei malnutrisaun, ne’e laos dezenvolvimentu. Governu tenke investe makaas iha agrikultura, edukasaun no saude,” dehan Antonio.
Governu tuir Antonio, tenke rona povu kiik sira iha area rural ne’ebe loron-loron hasoru susar ba bee, ba merkadu no ba asesu saude, tanba sira mak presiza tebes apoiu husi Estadu atu moris di’ak liu tan.
Entretantu, realidade hatudu katak projetu estrada no edifisiu foun barak mosu iha kapital, maibe iha area rural familia barak sei moris ho rendimentu kiik, susar atu sosa foos ho mina, no joven barak laiha kampu serbisu.
Agrikultor sira sei presiza apoiu ba fini no adubu, labarik sira sei la’o dook ba eskola, no komunidade balun sei susar atu hetan bee moos no asesu saude ne’ebe diak, situasaun ne’ebe hatudu dezenvolvimentu seidauk fo benefisiu balansu ba povu hotu.
(car)
