DILI, STLTIMORLESTE.com – Maske estrada iha Dili laran diak ona tanba kompanhia sira halo hela reabilitasaun, maibé kondisaun estrada iha área Fatumeta (Mamura), kontinua kuak nafatin.
Iha sentru sidade Dili hanesan Bemori, Komoro no Bidau, ekipamentu todan asfaltadora serbisu hela hodi hadi’a estrada aat sira, hanesan hatudu iha imajen tuir mai ne’e.
Maibé realidade kontráriu mak akontese iha diresaun Fatumeta ba Mamura. To’o ohin loron, estrada iha área refere kontinua kuak boot no nakonu ho rai-henek, hanesan hatudu iha foto sorin loos nian.
Kondisaun ne’e difikulta movimentu transporte no ema ne’ebé halai loron-loron iha fatin ne’e tenke halai neneik hodi desvia kuak. Situasaun ne’e konsidera perigozu no bele hamosu asidente.
Tanba ne’e, husu ba Governu liu husi Ministériu Obras Públika atu tau atensaun mós ba estrada ne’e, la’os konsentra de’it iha sentru sidade.
Alende ne’e, presiza mós iha sansaun todan husi Ministériu Obras Públika ba kompanhia sira ne’ebé kaer obra ho kualidade la di’ak, hodi nune’e bele garante kualidade no estrada labele estraga lalais iha tempu badak.
Motorista Adelino Martins ne’ebé loron-loron liu husi dalan ne’e hateten, nia tenke kuidadu tebes bainhira lori kareta tanba kuak boot no rai-henek barak iha dalan leten, ne’ebé bele estraga roda no hamosu asidente.
“Kondisaun ne’e la hadia lalais, ta’uk komunidade sira sei kontinua hasoru risku no gasta osan barak, hodi hadia sira-nia veíkulu tanba impaktu husi estrada kuak ne’e,”dehan Adelino ba STL, iha Dili, Sesta (25/09/2029).
Alende ne’e Adelino hatutan tan katak bainhira udan, bee nakonu iha kuak laran halo dalan ne’e sai risku liu tan ba motorista sira.
Entretantu Sidadaun Manuel Soares ne’ebé liu ba mai iha dalan ne’e mós lamenta no husu Governu atu hadia lalais, tanba sira ta’uk asidente bele akontese aat liu tan wainhira estrada kontinua husik kuak hela.
“Nunee espera katak Ministériu Obras Públika bele tau planu urjente hodi reabilita estrada iha Fatumeta, nune’e movimentu transporte bele la’o di’ak no seguru ba ema hotu,” hatete Manuel.
(car)
