Estrada-Eletrisidade-Bee Moos Sai Preokupasaun Ba Komunidade Ossouala

Xefe Suku Ossouala, Francisco Gama da Costa. (Foto: espesial)

BAUKAU, STLTIMORLESTE.com – Estrada, instalasaun enerjia eletrisidade inklui bee moos kontinua sai preokupasaun ba komunidade Suku Ossouala, iha Postu Administrativu Vemasi, Munisipiu Baukau.

Reprezentante komunidade atual Xefe Suku Ossouala, Fransisco Gama da Costa informa, preokupasaun refere hahu kedas Timor Leste nia ukun aan too ohin loron.

“Oras nee ami nia problema esensial liu mak estrada ligasaun ba postu, kauze 3 kilometru seidauk diak, tanba loke hela deit, bailoron ita bele asesu kuandu udan nee susar,” Francisco informa ba STL, iha Vila Antiga, Segunda (03/02/2025).

Francisco argumenta, komunidade Suku Ossouala maioria moris vida agrikultura, neebe ativu iha merkadu faan produtu lokal sira hafoin hetan osan hodi sustenta ekonomia familia, maibe daudaun labele lori sai produtu lokal sira ba asesu iha merkadu, tanba transporte publiku labele halo movimentu too iha komunidade sira hodi tula sai produtu ba iha merkadu postu no munisipiu.

Aleinde mos fo impaktu ba kompradores sira iha suku refere, tanba produtu importadu sira hanesan mina tein, masin no seluk tan neebe faan husi empreza Timoroan sira baibain ho transporte privadu faan too suku refere, daudaun labele ona, tanba tempu udan rai kois.

Kona-ba atu asesu fasilidade Saude, Suku Ossouala iha Aldeia 5, neebe komunidade hela besik iha baliza Postu Venilale no area Vemasi Vila la fo impaktu, tanba besik hodi asesu lalais fasilidade saude bainhira nesesidade ba tratamentu saude emerjensia.

Maibe komunidade sira neebe hela iha area klaran, bainhira iha nesesidade saude emerjensia atu asesu lalais ba fasilidade saude hasoru difikuldade, tanba tempu udan transporte publiku, privadu inklui ambulansia labele too direita hodi tula komunidade neebe moras, maibe tenke para iha dalan.

Estrada rural refere, husi Postu Vemasi Vila too Ossouala ho distansia km 20 resin, neebe ILO konsege reabilta balu remata iha tinan 2023, maibe husi Suku Uatulari too Ossouala hela km 3 resin sei grave, tanba seidauk reabilita

Nunee parte suku 2, hanesan Ossouala no Uatilari relata ona proposta konjunta ba parte relevante iha munisipal, konsege hetan resposta, tanba orienta ona ekipa halo levantamentu tekniku iha terrenu nomos prepara ona BoQ, tuir planu sei implementa iha tinan nee, tanba remata ona konsultasaun publiku, hein kompanhia implementador.

Kona-ba asesu eletrisidade iha suku, reprezentante komunidade Ossouala nee informa, komunidade hamutuk bairu 4 kompostu Uatubela, Fatohomesa, Komulale no Girlale neebe rejistu husi Aldeia diferente iha Suku Ossouala seidauk asesu, tanba hela dook husi linha eletrisidade.

Liga ba asuntu nee, STL tenta atu konfirma Diretor Servisu Ministeriu Obras Publiku Munisipiu Baukau no Supervisor EDTL.Ep Munisipiu Baukau, maibe laiha fatin atu fo komentariu.

Entretantu Suku Ossouala iha Aldeia 5 mak hanesan Hoineuwai, Uaiknasa, Lolinunu, Kaidenulale inklui Umaiku ho total populasaun rihun 2 resin neebe rejistu husi xefe familia rihun 1 resin neebe maioria moris vida agrikultura.

(EST 2)

Share it :

Leave a Reply

Your email address will not be published. Required fields are marked *