DILI, STLTIMORLESTE.com – Anin boot iha loron hirak nee nia laran, huu no lori rai rahun sae makaas iha estrada no dalan sira, laos deit iha dalan maibe mos ba uma no eskola sira nakonu ho rai rahun.
Ida nee mak sempre akontese bainhira troka klima ida ba klima seluk. Baihira tempu udan iha dalan no estrada sira nakonu ho bee nalihun, dala ruma bele sai tiha hanesan bee dalan ou mota kiik ida, tanba halo ema labele lao ain husi fatin nee hodi ba fali fatin seluk. Wainhira tempu udan ka udan been tun hela deit halo ema laran susar atu lao sai ba mai, tanba udan ben la fo fatin ka tun la para. Iha tempu udan, dalan no estrada sira sei nakonu ho foer neeba naklekar lori husi udan been. Be dalan ou valeta sira sei labele akumula udan ben, tanba nakonu ho foer iha laran. Nunee bee sira neebe tuir los tenke halai liu husi valeta kuak neebe prepara ba, maibe tanba foer nakonu tenke sai hotu mai estrada laran no dalan sira, hodi difikulta movimentu ema nian no transporte sira, no bainhira udan ben tun volume makas no durasaun la too oras ida sei akontese inundasaun iha fat-fatin, no rai sei halai halo komunidade neebe hela iha rai lolon balun tenke lakon hela fatin, tanba hetan estragus husi natureza.
Nunee bainhira udan ben nee para, muda fali ba klima bai loron ka rai maran. Wainhira anin, sei hodi huu rai rahun sae iha dalan no fat-fatin sira, iha tempu nee rai rahun sei hafalun sasan hotu iha dalan nomos fatin sira hotu.
Tuir Koordenador Eskola EBF 12 de Outubro, Fernando Bareto dehan, bainhira iha tempu bailoron hanesan nee, eskola nee rai rahun sae makas, tanba bainhira anin hu husi tasi mai, halo rai rahun sira iha tasi ibun no estrada nian sae makaas. Iha Estrada no dalan sira mos hanesan, anin huu makas halo rai rahun sira sae hotu taka tiha dalan. Dala ruma halo ema sira lori transporte neemos tauk oituan tiha, maibe importante mak lao nee tenke atensaun no haree dalan.
Eskola ida nee, hanesan ema hotu hantene iha Tasitolu nee nakonu ho rai rahun, satan tama ba bailoron hanesan nee rai rahun makas. Neebe diak eskola ida nee rasik iha bee hodi rega, neebe ense hela iha profile ka masa boot nee. Neebe haree ba rai maran ona no rai rahun sae, nee rega lalais tiha para alunus no profesora sira bele mai eskola no hanorin ho diak, dehan nia.
Nia hatutan, bailoron hanesan nee mak anin ho rai rahun makas, maibe labarik sira mai eskola nafatin. Iha tempu udan neemak dalan iha eskola oin nee labarik sira liu ladiak, tanba udan been nalihun tiha maibe inan aman sira sempre kolabora hodi lori no kous sira nia oan tama eskola nafatin.
Nunee mos Negosiante Agustinha do Rego neebe faan modo iha Kampung Baru hatete, anin makaas hanesan nee huu rai rahun sae makaas mai modo sira, maibe sempre lori be rega tutuir para labele foer, selae ema lakohi sosa. Anin laos huu deit rai rahun mais huu lona no kalen sira, neebe sira didin no satan hodi faan modo ba.
Tuir nia, mais ida nee mak natureza ona, bainhira tempu udan, ema hakilar dehan udan makas no halo bee nalihun no tama iha uma no fat-fatin. Bainhira bailoron anin boot no rai maran halo rai rahun makas. Neebe ema moris labele ses husi buat sira nee, hanesan iha Malae sira nian nee, tempu salju no udan jelu mos iha hotu. Maske nunee nafatin halo atividade negosiu, sekuandu haree ba mak makas entaun taka metin tiha modo sira, lori fila fali ba uma.
(dom)
