DILI, STLTIMORLESTE.com – Estudante husi Eskola Basico Central (EBC) 30 de Agostu kontenti han hahan merenda eskolar nian, neebe fornese husi Ministériu Edukasaun, tanba la presiza lori osan ba eskola hodi gasta bá kios sira.
Estudante EBC 30 de Agostu, Celita Gomes husi oitavo ano dehan, kontenti han hahan merenda eskolar nian, tanba iha nutrisaun no halo bosu kabun diak to fila uma. Hahan neebe iha laos han deit etu ho modo tahan maibe han nan karau kahur ho koto ben, nomos han ho aifuan sira.
“Hau kontenti los han hahan neebe tein iha eskola nee, tanba bele ajuda ona ami neebe inan aman laiha osan atu fo bá ami hodi gasta iha eskola. Bá hau nee diak los, bainhira rekreu ami sai mai forma iha dapur oin hodi simu hahan sira nee han to hotu hodi Tama fali eskola,” dehan nia bá STL iha Komoro, Tersa (19/05/2026).
Nai hatutan, merenda eskolar iha eskola sempre lao diak, nunka paradu. Neebe lor-loron estudante sira han hela deit, nunka paradu.
Nunee mos Flaviao Castro katak, hahan merenda eskolar nee gostu no nutrisaun los, tanba han etu, modo no nan karau isin, i han mos aifuan fresku sira. So foremungu ho susuben mak han dala ida iha Sesta deit.
“Merenda eskola agora nee la han sosis ho ayam potong, han deit mak modo tahan, nan ho koto ben. Neebe diak los, halo ami bosu diak. Dala ruma etu mak oituan, maibe laos loron-loron,” dehan nian.
Nia hatete, desde merenda eskola lao, nunka lori osan Sosa sasan sira iha kios ka liur, lori deit osan sae mikrolet nian, tanba hela iha Golgota.
Entertantu Diretor Eskola EBC 30 de Agostu, Baltazar Borromeu katak,
Merenda eskolar iha eskola nee sempre lao diak, menu neebe iha lao tuir orientasaun husi Ministeriu Edukasaun, hodi ezekuta orsamentu tuir orientasaun neebe iha.
(dom)
