COVALIMA, STLTIMORLESTE.com – Estudante sira iha Eskola Bázika Sentral (EBC) Dais Covalima la gosta menu sasoro ne’ebé iha Programa Merenda Eskolar (PME), tanba konsidera menu refere la atrai ba sira, liuliu ba estudante sira ne’ebé boot ona.
Estudante setimu anu, João Lorenço Amaral Barreto, hateten katak, iha jerál, estudante sira gosta menu PME, maibé bainhira menu sasoro tama iha oráriu, estudante balu lakohi han no husu atu troka menu refere ho hahán seluk ne’ebé sira gosta liután.
“Ami haan sasoro ne’e mak ladun di’ak. Ami nia hakarak haan etu ho modo, la’ós sasoro. Bainhira haan sasoro, ami sente triste tanba ami boot ona,” hateten João Lorenço ba jornalista sira iha EBC Dais, Segunda-feira (05/10/2026).
Nia esplika katak, menu PME iha EBC Dais varia tuir loron. Iha Segunda-feira, estudante sira simu sasoro, Tersa-feira, etu ho modo no na’an karau, Kuarta-feira no Kinta-feira, etu ho tahu no modo mutin, enkuantu Sesta-feira, etu ho manu-tolun.
João hateten katak merenda eskolar ne’e mós akompaña ho ai-fuan, hanesan hudi no aidila tasak, inklui sabraka, maibé estudante sira hakarak atu menu inklui mos ai-fuan seluk hanesan apel no pateka.
Nia husu parte kompetente sira atu haree fila-fali menu sasoro iha PME, hodi nune’e merenda eskolar bele tuir preferénsia no nesesidade estudante sira, no evita hahán ne’ebé estudante sira lakohi han.
Iha parte seluk, Adjuntu Diretór EBC Dais, Santiago do Nacimento Amaral, rekoñese katak preokupasaun estudante sira kona-ba menu sasoro ne’e presiza hetan atensaun husi parte implementadora.
Nia hateten katak bainhira estudante sira han iha merenda ne’ebé fornese, ida ne’e bele sai indikasaun katak menu refere la atrai ba estudante sira.
“Kuandu sasoro, estudante sira la han hotu, signifika menu ne’e la atrai ba ita nia estudante. Entaun iha tempu ne’ebá hau ba hato’o ona iha munisípiu atu muda ba menu seluk, maibé to’o agora seidauk iha mudansa kona-ba ida ne’e,” hateten Santiago
Nia hatutan katak preokupasaun estudante sira sei relata ba Diretór Eskola, hodi bele fó hanoin ba parte kompetente sira atu konsidera substituisaun menu sasoro ho menu seluk ne’ebé bele aumenta interese estudante sira atu han merenda eskolar.
Tuir dadus husi EBC Dais, eskola refere iha totál estudante 524, ho sala aprendizajem hamutuk 9, no profesór 21, ne’ebé mai husi agrupamentu haat.
(tom)
