DILI, STLTIMORLESTE.com – Estudante Universidade Oriental Timor Lorosae (UNITAL) husi Fakuldade Ciência Saude (FCS) hamutuk nain 174 halo ona yudisium iha Terra Santa.
Lia hirak nee hatoo Dekanu Fakuldade Ciensia Saude UNITAL, Leao Pinto liu husi nia diskursu iha ambitu Yudisium Fakuldade Ciensia Saude ba dala XVII, iha Terra Santa, Segunda (11/08/2026).
Moto ba yudisium, Forma Profisional Saude ho Integridade, Prontu Servi Komunidade ho Domin, total estudante yudisium husi Fakuldade Ciência Saude hamutuk 174, kompostu husi Departamentu Enfermajen iha ema nain 104, Departamentu Analisis Klinika Laboratoriu ema nain 61, Departamentu Saude Publiku ema nain 4 no Departamentu Nutrisaun ema nain 5.
“Loron ohin loron neebe sai importansia ba imi hotu, no loron ohin loron neebe sai istoria ba imi nia luta durante iha UNITAL, ita boot sira susesu iha profisional saude laos deit mai husi ita boot sira mesak, maibe esforsu mos husi inan aman, familia, dosente sira hotu nomos kontribuisaun husi kolega sira seluk hodi bele antiji imi nia susesu ba ohin loron, Fakuldade Ciência Saude apresiasaun no orgulhu ba ita boot sira hotu,” hatete Dekanu.
Tanba durante prosesu estudu iha UNITAL, estudante sira hasoru dezafiu, bareira, problema oin-oin, maibe ikus mai imi bele hetan susesu loron ohin tanba imi nia esforsu, imi nia vontade no imi nia pasiensia, ohin loron imi hamutuk inan aman no familia sira hotu iha fatin ida ne,e hodi simu titulu licenciatura ba enfermajen, Licenciatura Saude Publiku no Bacharelato ba analisis Clinika Laboratoriu, Bacharelato ba Nutrisaun, ami hotu orgulhu no kontente ba imi nia susesu ida nee, atu nunee finalista hamutuk nain 174 simu apalidu foun hodi hatutan imi nia naran mak Licenciatura no Bacharelato.
Ami hotu nia esperansa no fo nafatin korajen ba ita boot sira, Licenciatura no Bacharelato hanesan grau titulu neebe universidade oferese ona ba finalista sira hodi fo garante atu bele luta ba imi nia futuru,” dehan nia.
Iha oportunidade ida nee husu ba imi nain 174, matenek laos too iha nee deit, maibe kontinua estudu atu bele hetan konhesimentu neebe diak liu tan no grau neebe sufisiente hodi bele fasilita ba imi nia moris iha era globalizasaun oin mai.
Tanba gelar sei la haree ba ema riku no ema kiak, maibe gelar ema hotu iha direitu atu bele hetan, wainhira iha boa vontade, tanba nee hatoo parabens ba finalista nain 174, espera katak imi nia matenek bele ajuda komunidade liu-liu komunidade neebe presiza ita boot sira nia tulun, oras nee daudaun problema saude sei eziste iha rai laran, ho imi nia prezensa bele fo kontribuisaun hodi rezolve problema saude iha nasaun ida nee.
Oportunidade ida nee mos hau hatoo ba imi nain 174 katak, dedika imi nia aan iha komunidade, hatudu imi nia konhesimentu, hatudu imi nia profisionais no kuidadu almamater Universidade durante imi nia moris tomak, tanba iha loron 17 Agostu tinan 2026, UNITAL, Fakuldade Ciência Saude entrega fila fali ita boot sira ba inan aman no familia sira hotu ho naran apalidu foun, atu kontinua esforsu no valoriza imi nia futuru.
Iha fatin hanesan, Finalista Natalino Marques Soares sente kontente, tanba ohin loron bele hetan susesu, iha prosesu estadu dala ruma hasoru dezafiu oin-oin, la signifika katak hamate hau nia espiritu luta ba dalan susesu nian, tanba ho esforsu tomak ohin loron bele simu Yudisium,” dehan Natalino.
Loron espesial agradese ba pai ho mae, ba nia domin durante apiu hau iha prosesu estudu nian, ohin loron bele halo Yudisium iha loron balun sei gradua liafuan murak hatoo agradese no obrigadu ba pai ho mae, familia nomos dosente UNITAL ho dedikasaun pasiensia hodi fahe matenek ba ami.
(joa)
