BAUCAU, STLTIMORLESTE.com – Estudante benefisiariu ba Programa Merenda Eskolar husi eskola 15 iha Munisipiu Baucau, hetan modo la tuir menu, tanba dala ruma la hetan modo naan karau tuir orariu neebe difini ona.
Xefe Departementu Parke Eskolar iha Servisu Munisipal Edukasaun Baucau, Sabino Arlindo Ximenes aprezenta, implementasaun programa merenda eskolar ba anu letivu 2026 iha Baucau hahu iha fulan Janeiru no too inisiu fulan Junhu nee lao diak tuir mata dalan neebe indika ona, kada estudante benefisiariu hetan 0,42 sentavus direitu atu hetan modo hanesan naan karau, manu tolu no seluk tan tuir mata dalan haruka, maibe iha eskola balu implementa programa refere fornese hahan ba estudante benefisiariu sira la tuir menu neebe iha.
“Ita nia diresaun rasik tuun ba observa direita katak, iha eskola balu implementa programa merenda eskolar lao duni maibe la tuir menu neebe mak iha,” hateten Xefe Departementu Parke Eskolar iha Servisu Munisipal Edukasaun Baucau, Sabino Arlindo Ximenes ba STL iha nia knaar fatin Vila Nova Baucau, Segunda (01/06/2026).
Nia sublina, eskola hirak neebe durante anu letivu 2026 implementa programa merenda eskolar fornese hahan ba estudante benefisiariu sira la tuir menu neebe indika ona, iha Postu Administrativu Baguia eskola 4, Quelicai eskola 3, Quelicai Antigu eskola 2, Matebian eskola 2 no iha Postu Administrativu Laga eskola 4.
Nia fundamenta, husi eskola refere neebe estudante benefisiariu sira asesu hahan husi programa merenda eskolar la tuir menu neebe iha, mak hanesan estudante sira dala ruma la hetan modo naan karau tuir orariu neebe determina, maibe hetan fatin modo manu tolu.
“Iha menu nee dehan kuartu han naan, mais sira labele asesu naan entaun troka fali manu tolun, entaun ita dehan sira la implementa tuir menu neebe iha por cauza de situação, tanba sira iha area remotas difisil tebes atu hetan naan,” Sabino akresenta.
Nia dekrala, eskola 15 refere eziste iha area remotas, tanba nee difisil hetan modo naan iha programa merenda eskolar tuir orariu difinidu, maibe situasaun nee akontese provizoriu deit, tanba iha tempu udan deit mak Ekipa Jestaun Programa la halo kompras ba naan karau iha merkadu, tanba kondisaun estrada, enkuantu bainhira udan para parte Ekipa Jestaun Programa sempre asesu merkadu kompras naan karau hodi halo modo oferese ba estudante benefisiariu sira.
Entretantu programa merenda eskolar ba anu letivu 2026 iha Munisipiu Baucau hahu iha loron 20 Janeiru ho valor orsamentu US$ 2,788,690 fo benefisiu ba estudante 34.614 husi eskola sira kompostu Pre-Eskolar, Ensinu Baziku Primeiru, Segundu no Terseiru Siklu sira.
(alb)
