DILI, STLTIMORLESTE.com – Falta kadeira ba estudante sira iha Eskola Básiku Sentrál (EBC) Dais, Munisípiu Covalima, tanba estudante balu iha klase setimu anu turma A no turma C, na’in rua tuur iha kadeira ida durante prosesu aprendizajen.
Estudante setimu anu, João Lorenço Amaral Barreto, hateten katak prosesu aprendizajem iha eskola refere la’o di’ak, maibé limitasaun fasilidade, liuliu kadeira ba estudante sira, sai obstákulu ba konfortu no partisipasaun estudante iha sala aula.
“Meza-kadeira iha ne’e la di’ak, tanba balu tuur la to’o. Na’in rua tur iha meza rua kadeira ida,” hateten João Lorenço ba jornalista sira iha EBC Dais, Segunda (05/10/2026).
João esplika katak, kada loron iha sala aula balu, estudante na’in rua tenki tur hamutuk iha kadeira ida ne’ebé prinsipálmente destina ba estudante ida.
Nia hateten katak, kondisaun ne’e akontese liuliu iha klase setimu anu turma A no turma C, tanba ne’e nia husu Ministériu Edukasaun atu haree no solusiona falta fasilidade refere, hodi nune’e estudante sira bele partisipa iha prosesu aprendizajem ho kondisaun di’ak no konfortável.
Enkuantu ne’e, Adjuntu Diretór EBC Dais, Santiago do Nacimento Amaral, rekoñese katak eskola refere enfrenta menus fasilidade mobiliáriu ba estudante sira.
Nia hateten katak, situasaun menus kadeira obriga estudante sira iha sala balu na’in rua
tuur hamutuk iha kadeira ida.
“Kadeira sira ne’ebé estudante uza balu la di’ak ona. Problema ne’e ami identifika no ami haruka ona ba Ministériu. Ami presiza tan kadeira 120,”
Santiago hateten katak, preokupasaun kona-ba falta kadeira ne’e la’ós problema foun, maibé eskola identifika ona dezde tinan 2024 ne’ebé relata ona ba Ministériu Edukasaun.
No iha tinan 2026 ne’e, eskola kontinua submete proposta direta ba Ministériu Edukasaun atu responde ba nesesidade kadeira, maibé to’o agora seidauk hetan resposta.
Tuir dadus husi EBC Dais, eskola refere iha totál estudante na’in 524, ho sala aprendizajem hamutuk 9, no profesór 21, ne’ebé mai husi agrupamentu haat.
(tom)
