DILI, STLTIMORLESTE.com Formatura sai hanesan kultura ida ba estudante sira hotu hahu husi Pre-Eskolar too Eskola Sekundariu, antes atu prosesu aprendizajen iha aula tenke hahu uluk ho formatura.
Iha formatura nee estudante sira laos deit rona chamada husi komando de formatura, maibe liu husi biban nee estudante sira sei rona mos liafuan no avizu balun husi diretur no koordenador sira neebe relasiona ho eskola nian.
Tuir observasaun diariu nee, iha formatura Eskola Basico Central (EBC) Farol no 30 de Agostu nunee mos iha EBF 12 de Outobru no seluk tan, estudante sira forma uluk mak foin tama ba sala laran hodi hahu prosesu aprendizajen. Iha formatura nia laran, alende aprende kona ba formatura nian, estudante sira husi EBF nian neebe professor prefere sei lee uluk livru historia badak no kanta knanuk ba sira nia kolega sira mak foin tama ba eskola laran. Iha biban formasaun laran nee halo estudante sira kontenti no haksolok hodi kanta no rona historia hamutuk.
Tuir Profesora Juleta katak, formatura nee lao tuir regulamentu Ministeriu Edukasaun nian, para estudante sira bele hatene no nunee aban bainrua sira bele hola parte iha isar bandeira nasional iha loron boot sira. Nunee mos kanta no konta historia nee lao tuir kurikulum neebe mai husi edukasaun.
Estudante Marino Goncalves husi EBF 5 Komoro hatete, nia kontenti tebes bainhira professor hili nia sai nudar komando formatura, tanba iha biban nee nia sente iha mental hodi hamrik iha oion hodi dirize kolega sira hotu.
Hau kontenti bainhira hili hau sai komando formatura iha eskola, para hau bele iha mental hamrik iha oin, dehan nia ba STL iha Komoro, Tersa (16/06/2026).
Nia katak, iha formatura laran nee laos deit halo formatura maibe sei rona mos knanuk furak no istoria furak neebe sei dirizi husi kolega nain rua ba kolega sira.
Nunee mos Estudante Eskola Sekundario Sao Pedro, Sonia hatete, formatura nee importante no diak ba estudante sira iha eskola antes hahu aula. Liu husi formatura nee sei rona mos avizu balun neebe importante balun neebe sei hatoo husi Diretor Eskola no profesor sira.
(dom)
