DILI, STLTIMORLESTE.com – Estudante sira kontenti merenda eskolar lao hikas fali, neebe antes nee paradu tiha semana ida resin tanba orsamentu primeiru trimestri hotu.
Estudante husi Eskola Baziku Filial 12 de Outubro, Inacio Rivandes hatete, nia kontenti bele merenda hikas fali iha eskola hanesan baibain, se lae too rekreu halo sira gasta osan tenke ba sosa sasan neebe faan iha liur.
Ohin ami hotu kontenti tanba bele merenda fali ona hanesan uluk, se lae ami mai eskola tenke husu ba apa ho ama hodi sosa hahan neebe ema faan besik iha eskola nee,” dehan nia ba STL iha Tasi-Tolu, Kuarta (17/06/2026).
Nia afirma, agora la presiza husu tan osan ba inan aman ona, tanba merenda lao ona. Mai lori deit osan sae kareta nian.
Nunee mos Juela Fatima hatete, bainhira merenda eskolar para tiha, eskola seidauk sai mos senti hamlaha tiha ona. Mais agora lae, tama aula simu tiha materia sira husu profesor too rekreu merenda tiha lai mak tama fali aula, too uma mos sei bosu hela. Merenda laiha nee too tempu rekreu tenke sai ba sosa sasan sira neebe faan iha eskola liur.
Antes nee Koordenador EBF 12 de Outubro, Fernando Barreto dehan, merenda eskolar para tiha tanba kestaun orsamentu. Depois orsamentu segundu trimestri foti ona, programa merenda eskolar sei lao fali. Entertantu orsamentu ba primeiru trimestri nian mak ezekuta hotu ona, nunee merenda eskolar mos laiha. Maibe espera semana ida mai tan merenda eskolar lao hikas fali ona.
(dom)
