BAUKAU, STLTIMORLESTE.com – Estudante nain neen (6) neebe Komando Polisia Nasional Timor Leste Munisipiu Baukau kaptura iha Eskola Ensinu Sekundaria Jeral (ESJ) 01 Tirilolo, tanba problema ligadu Grupu Arte Marsiais (GAM) no Grupu Arte Ritual (GAR).
Komadante Interinu Komando Polisia Munisipiu Baukau, Superintendente João Sancho Pires esplika, kazu kaptura estudante feto nain lima (5) inklui mane ida (1) loron 12 Abril nee, iha Eskola ESJ 01 Tirilolo, problema entre estudante feto ho feto inklui estudante mane ida neebe baku malu, tanba deskonfia envolvimentu ba iha GAM no GAR diferente.
“Nia motivu labarik estudunte nee hatene deit ona, dala ruma sira joven ona mosu problema ligadu GAM ho GAR balun, feto ho feto raut malu, ita deskofia mane balun lori mai halo identifika,” informa João Sancho Pires ba jornalista sira iha knaar fatin Vila Antiga, Baukau, Tersa (15/04/2025).
Nia sublina, hafoin akontese parte Komando Polisia Munisipiu Baukau liu husi ekipa Task Force too fatin hodi evakua estudante nain 6 refere hodi submete ba prosesu identifikasaun, tanba estudante refere deskonfia involve iha GAM no GAR balun.
Nia fundamenta, hafoin remata identifikasaun liu husi Servisu Investigasaun Kriminal bolu estudante nain neen refere nia familia hodi fo hatene, tanba hamosu problema, maibe prosesu ba kazu nee kontinua lao.
“Esforsu Komando nian lao hela, orienta iha dader ba fatin entrankamentu iha Baukau, ita mos patrolhu ba eskola sira, orienta OPS sira no eskuadra movel ba eskola sira balun,” João Sancho Pires argumentu.
Nia katak, atu evita nafatin entre estudunte sira baku malu iha resintu eskola no problema seluk hodi garante seguransa pas no estabilidade iha Munisipiu Baukau, Komando Polisia nafatin orienta membru sira halo patrolhu rutina iha area juridiku Baukau.
(tom)
