DILI, STLTIMORLESTE.com – Ohin loron moris iha era dijitalizasaun, buat neebe iha tempu uluk difisil ba ema atu asesu no hetan, tempu ida agora buat hotu fasil bá ema hotu bele asesu liu husi media sosial sira, maibe ema balun uza la tuir nia dalan. Buat ida media sosial nee ajuda tebes ema atu dezenvolve aan no asesu informasaun sira hotu.
Liafuan nee haktuir husi Diretora EBC Farol, Brigida Faustina Soares Guterres Coelho bá STL iha nia knaar fatin Farol, Segunda (01/06/2026).
Nia hatete, media sosial neebe ema tau nee laos atu uza fali sasan privadu hodi fo sai hotu iha neeba, maibe atu ajuda no bele deskobre sai buat neebe atu desenvolve iha ma idak-idak nia aan.
“Media sosial nee ajuda Iita hodi hatene no bele deskobrre sai buat neebe atu desenvolve ita nia aan. Por ezemplu hanesan google, liafuan saida mak la komprende bele bá buka iha neeba, nia bele ajuda mais la signifika katak media sosial ka internet nee ema kria para estraga ita nia vida no moris, maibe ita ema neemak uza sala buat sira nee,” dehan nia.
Tanba nee husu bá estudante sira atu uza didiak media sosial, bainhira profesor sira fo TPC ruma bainhira la kompriende bele ba buka iha neeba. Internet nee diak tebes hodi ajuda ema halo komunikasaun liu husi sms no telfone, no media sosial sira nee bele ajuda asesu informasaun sira.
Nia afirma, estudante sira bainhira uza media sosial tenke uza ho tempu, bainhira halo TPC remata, halo fali buat seluk ajuda inan aman. Importante liu mak uza media sosial labele ho tempu neebe naruk, diak liu uza tempu barak hodi estuda materia sira neebe manorin nain sira fo iha eskola, fila mai uma le fila fali.
“Husu bá estudante sira, uza media sosial ho diak no sasan sira neebe Inan-Aman oferese bá ita, tanba buat neebe mak agora ita uza nee inan aman nian. Tanba inan aman sira oferese sira nia aan no vida tomak bá oan sira, nunee oan sira mos tenke uza ho diak para aban bainrua sira ferik katuas ita fo fali bá sira, neebe uza sasan husi inan aman sira tenke ho responsabilidade,” nia tenik.
Nunee mos professora EBF Paiol, Clarinha da Costa katak, estudante sira bainhira uza media sosial nee presiza uza ho diak, tanba tempu ida agora nee media sosial nee ajuda tebes ema iha iha fatin hotu-hotu. Neebe estudante sira labele uza fali media sosial nee hodi fo sai fali buat neebe ladiak bá iha publiku. Diak liu uza media sosial ho iak, prende no buka tuir buat Diak neebe iha media sosial sira hodi desenvolve imi nia aan.
“Hau haree ema balun uza media sosial nee la tuir dalan, media sosial nee ajuda ita atu aprende no buka tuir informasaun sira, laos atu tau fali problema privadu no trata fali ema lae. Neebe husu bá estudante sira bainhira uza media sosial nee presiza uza didiak bá, aprende buat positivu sira neebe iha media sosial tau, bainhira iha TPC no la komprende lia fuan balun bele buka iha google,” dehan nia bá STL iha Balide.
Nunee mos Profesora Eskola Cafe Maliana, Augusta Coe Malui katak, media sosial nee nuudar meiu ida atu fasilita ema iha vida loron-loron, ajuda ema atu asesu informasaun no mos komunika ba malu. Neebe bainhira atu uza media sosial ho forma neebe diak no loos tenke hanoin uluk antes atu publika ka partilha informasaun ruma, tenke fo informasaun neebe los no la halo dúvida. Proteje o nia privasidade, labele partilha dadus pesoal no kontrola tempu bainhira uza media sosial. Uza media hodi aproveita aprende buat diak ka buat neebe atu dezenvolve ema ida-idak nia aan.
(dom)
