DILI, STLTIMORLESTE.com – Estudante Ensino Basico I no II ciclo São Luis Gonzaga kontenti ho kompetisaun neebe halao iha eskola, hodi hasoru selebrasaun aniversariu Padroeiro São Luis Gonzaga neebe sei monu iha loron 20 Junhu tinan nee.
Nunee iha loron Sesta (19/06/2026), Ensino Basico I no II ciclo São Luis Gonzaga realiza atividade enseramentu no distribuisaun premios ba estudante sira neebe sai manan nain iha kompetisaun oi-oin, iha ambitu komemorasaun aniversariu Padroeiro São Luis Gonzaga.
Kompetisaun sira neebe organiza mak hanesan jogu futsal, sertame, dada tali, tata berlindus, halai karon no dansa cad, neebe hetan partisipasaun ativu no entuziasmu tebes husi estudante sira durante semana rua.
Atividade ida nee laos deit atu fo rekonhesimentu ba estudante sira neebe sai manan, maibe mos atu haburas valor importante sira hanesan espiritu ekipa, solidariedade, disiplina, responsabilidade, kreatividade no sportividade iha ambiente eskolar.
Iha okaziaun nee Diretor Eskola, Pe. Cesar Magno hatoo parabens no apresiasaun ba estudante hotu-hotu neebe partissipa ho diak, tanba partisipasaun ida nee hatudu katak edukasaun lao hamutuk ho dezenvolvimentu talentu no relasaun diak entre estudante sira.
Padre nee mos hatoo agradesimentu espesial ba profesor sira, komisaun organizadora, inan-aman no parte tomak neebe fo apoiu no servisu hamutuk hodi garante susesu atividade ida nee.
Nunee Estudante Tisizu Nunes Gomes hatete, kontenti tebes partisipa iha jogu neebe halo iha eskola durante nee, tanba ho jogu sira nee halo sira nuudar estudate kontenti hodi partisipa hotu.
Hau kontenti los, tanba loron-loron eskola halo hela deit jogu mai ami estudante sira. Jogu nee entre ami clase ida hasoru clase ida, neebe ami hotu kontenti tebes. Ba kolega sira neebe hetan hadia ka premiu nee hau hatoo parabens ba imi no parabens mos ba ita hotu,” dehan nia.
Nia hatutan, jogu nee halao tanba atu selebra eskola nia loron aniversariu Padroeiro São Luis Gonzaga, neebe mak aban sei misa hamutuk iha eskola.
Entertantu tuir informasaun neebe diariu nee asesu husi profesor sira katak, relasiona ho loron São Luis Gonzaga nian sei iha selebrasaun misa agradesimentu iha loron Sabadu (20/06/20260, oras 10:00 OTL, depois de misa sei iha konfraternizasaun hamutuk iha salaun São Luis Gonzaga.
(dom)
