DILI, STLTIMORLESTE.com – Tinan nee estudante nain 10 neebe kontinua estudu iha Eskola Sekundariu Nobel no Ensinu Baziku Sentral Nobel da Paz la selu propinas kada fulan, tanba kbiit laek nia oan fo gratuita.
Dehan Jeremias Pinto de Jesus, hanesan fundador eskola Nobel da Paz ba STL iha nia knaar fatin, Segunda nee (03/02/2025).
“Tinan nee estudante kuaze nain 10 nunee mak ami fo gratuita, sira la selu propinas kada fulan, tanba sira mai deklara kbiit laek nia oan, nain 10 nee laos sekundariu deit, maibe ita sura ho nível Ensinu Baziku Nobel da Paz ninia mak hamutuk nain 10, nee duni sira la selu propinas, maibe too ezame mak sira fo osan kontribuisaun, nee mos la obriga, depende ba sira nian kbiit neebe iha,” nia afirma
Tanba tuir Jeremias katak, eskola nobel laos foin mak fo eskola gratuita ba ema kbiit laek nian oan, maibe dezde uluk sempre ajuda sira, nunee mos ema ho kondisaun defisiensia sira neebe mak balu remata ona sira nian estudu iha eskola ida nee.
“Ita nafatin apoiu estudu ba kbiit laek oan sira, liu husi kada fulan sira la selu propinas eskola, ita fo gratuita ba sira too sira remata sira nian estudu iha eskola ida nee, nee duni tinan nee estudantes nain 10,” nia esplika.
Nunee mos Leonito Nunes Martins, hanesan estudante dehan, sira selu propinas kada fulan, maibe ba kolega sira neebe mak inan aman laiha kbiit, nee sira eskola gratuita no la selu propinas.
(jac)