DILI, STLTIMORLESTE.com – Estudantes grupu B (Zero Boot) husi Pré-Escolar Sagrada Família Vila-Verde hamutuk 89 sei hala’o graduasaun iha loron 9 fulan Dezembru 2026.
Kordenador Pré-Escolar Sagrada Família Vila-Verde, Cornélio António Soares hato’o informasaun ne’e ba STL, Kinta-feira (08/10/2026).
Nia hatete katak, preparasaun ba serimónia graduasaun sei hala’o liuhusi kooperasaun entre parte eskola no inan-aman estudantes sira.
“Total ami nia estudantes grupu B ka Zero Boot hamutuk 89, ne’ebé sei partisipa iha graduasaun iha fulan Dezembru tinan ida ne’e. Ami servisu hamutuk ho inan-aman estudantes sira hodi organiza buat hotu kona-ba serimónia graduasaun, inklui dekorasaun no hahán no hemu. Parte eskola nian akompaña no ajuda inan-aman sira hodi hala’o preparasaun,” tenik nia.
Cornélio Soares hatete tan katak, administrasaun eskola prepara ona kaderneta no sertifikadu ba estudantes sira, atu bele uza bainhira kontinua ba eskola tuir mai.
Nia esplika katak, númeru estudantes tinan ida ne’e menus kompara ho tempu uluk, tanba durante prosesu ensinu-aprendizajen iha estudantes balun rezigna an, balun moras no balun muda ba eskola seluk.
“Numeru total estudantes Zero Boot hamutuk 89. Graduasaun nee tuir kalendáriu eskolar husi ME, ne’ebé hatete katak iha loron 9 Dezembru, estudantes sira hotu sei hala’o graduasaun,” hatete nia.
Enkuantu, Lúcio Maia, aman husi estudante hatete katak, nia oan agora iha grupu Zero Boot no sei partisipa iha graduasaun iha fulan Dezembru.
Nia hatete katak, inan-aman estudantes sira kontinua kooperasaun ho parte eskola hodi prepara serimónia graduasaun.
“Ami inan-aman estudantes sira nian nafatin koopera ho parte eskola hodi koalia kona-ba preparasaun graduasaun ne’ebé sei akontese iha fulan Dezembru tinan ida ne’e,” nia esplika.
Martinha Soares, inan husi estudante mos hatete katak, eskola sei halo enkontru ho inan-aman estudantes sira hodi koordena kona-ba preparasaun graduasaun.
Nia konsidera preparasaun hamutuk entre eskola no inan-aman importante atu garante serimónia graduasaun bele hala’o ho diak.
(jac)
