DILI, STLTIMORLESTE.com – Estudante sira husi Eskola Sekundária Jerál Públika 12 de Novembro iha talentu iha área desportiva, liuliu iha jogu futeboll salaun, ne’ebé eskola organiza kada loron Sabadu.
Diretor Eskola Sekundária Jerál Públika 12 de Novembro, Marculino Menezes Babo hato’o informasaun ne’e ba STL iha nia knaar fatin, Sesta (18/09/2026).
“Ami nia eskola halo atividade desportu futeboll salaun kada sábadu, hanesan preparasaun ba loron eskola nian 12 de Novembro. Futeboll salaun nee ba estudante feto no mane. Ami nia fasilidade desportiva sufisiente hela. Atividade desportiva nee partisipa estudante feto no mane sira ho númeru ne’ebé aas,” dehan nia.
Nia hatutan katak, atividade desportiva nee hala’o deit kada sábadu, tanba Segunda-feira to’o Sesta-feira estudante sira tenke partisipa iha prosesu ensinu no aprendizajen.
Marculino dehan, estudante feto no mane sira iha talentu iha área desportiva, maibé durante ne’e seidauk hetan oportunidade sufisiente atu hatudu no dezenvolve sira nia kapasidade.
“Estudante sira tantu feto no mane iha talentu ba área desportiva, tanba sira hala’o jogu futeboll. Atu hala’o atividade nee, presiza deit bola, no bola ne’ebé ami iha sufisiente atu sira bele hala’o atividade no explora sira nia talentu desportivu,” nia haktuir.
Nia subliña katak, estudante mane deit la’ós mak partisipa iha atividade nee, maibé estudante feto mos partisipa hamutuk iha jogu futeboll salaun kada sábadu.
“Ami nia estudante la’ós mane deit mak hola parte iha jogu nee, maibé feto ho mane hotu partisipa iha atividade jogu ne’ebé ami halo kada sábadu. Loron seluk sira tenke partisipa iha aula,” nia deklara.
(jac)
