DILI, STLTIMORLESTE.com – Embaixada EUA apoia Timor-Leste hametin kapasidade Inglés profisionál atu prepara engajamentu rejionál iha ASEAN.
Liuhusi komunikadu ne’ebé STL simu husi media EUA iha Dili, Kinta (08/10/2206) hatete, finansia simulasaun finál Programa Inglés Profisionál ba Líder Estratéjiku sira.
Eventu ne’e hala’o iha Palm Spring Hotel, Fatuhada, no envolve partisipante husi governu, akademia, media, ONG no organizasaun profisionál.
Enkarregada Negósius Interina Embaixada EUA, Charlette Betts, dehan Timor-Leste presiza profisionál sira ne’ebé bele reprezenta país ho konfiansa.
“EUA sente orgullu apoia Timor-Leste nia papél ne’ebé buras iha ASEAN no investe iha kapasidade ema,” dehan Charlette.
Nia hateten, Inglés hanesan lian traballu ASEAN, nune’e profisiénsia iha língua ne’e bele hametin Timor-Leste nia partisipasaun rejionál.
Programa ne’e, nia dehan, reflete kompromisu EUA atu apoia Timor-Leste nia kapasidade no parseria ba Indo-Pasífiku livre no nakloke.
Simulasaun finál fó oportunidade ba partisipante sira atu aplika kapasidade komunikasaun iha ambiente diplomátiku realístiku, hanesan reuniaun forúm ASEAN.
Eventu hahú ho diskursu abertura husi Reitór Universidade Nasionál Timor Lorosa’e, Joviano António da Costa, no Charlette Betts.
Programa formasaun Inglés profisionál no dezenvolvimentu lideransa hala’o durante fulan barak, ho objetivu hametin kapasidade partisipasaun rejionál.
Programa ne’e mos prepara Timor-Leste atu partisipa efikás iha forúm rejionál no internasionál nu’udar membru foun ASEAN.
Tanba Inglés mak lian traballu ASEAN, programa ne’e konsidera kontribuisaun ba prontidaun Timor-Leste atu aprofunda engajamentu rejionál.
Programa ne’e mos ajuda prepara kapasidade Timor-Leste ba ninia prezidénsia ASEAN iha futuru, liuhusi dezenvolvimentu komunikasaun profisionál.
Partisipante sira inklui funsionáriu governu, akademiku, peskizadór, jornalista, líder ONG, diplomata, membru asosiasaun no líder komunidade.
Durante semana formasaun, partisipante sira hametin profisiénsia Inglés no dezenvolve kapasidade iha fatin servisu no lideransa.
Kapasidade ne’ebé dezenvolve inklui partisipa iha reuniaun, halo aprezentasaun, atendimentu kliente, hakerek dokumentu, koordenasaun no jestaun.
Programa fó énfaze ba estratéjia komunikasaun prátika, vokabuláriu profisionál no konfiansa-an atu apoia servisu públiku efikás.
(dom)
