DILI, STLTIMORLESTE.com – Embaixada Estadus Unidus Amérika (EUA) iha Dili liu husi parseria ho Festival Internasional Filme iha Dili (DIFF), lansa ona Freedom 250, Espiritu Amerika nian iha filme – serie projesaun no seminariu filme neebe planeia iha fulan hirak tuir mai nuudar parte ida husi inisiativa global freedom 250 nian neebe selebra Amerika nia aniversariu ba dala 250, hodi oferese ba publiku Timoroan sira.
“Plataforma ida nee halibur ema hodi esplora filme Amerikanu nian no ami-nia valor neebe ita fahe ba malu hanesan edukasaun, perseveransa, kriatividade, oportunidade, no komunidade. Tradisaun naruk no istoriku kona-ba exelensia Amerikanu nian iha halo filme laos deit ona iha Hollywood, maibe ida-nee pertense ba mundu,” dehan karta komunikadu imprensa neebe STL simu husi media EUA, Sesta, (17/07/2026).
Komunikadu nee esplika, abertura ba projesaun gratuita filme Akeelah and the Bee, halao iha loron 16 Jullu iha Fundação Oriente, filme inspirador ida kona-ba konfiansa, mentorizasaun, no kbiit transformador husi edukasaun. Estudante sira, kriador emerjente sira, DIFF nia antigu-alunus, reprezentante diplomatiku sira, no publiku Timoroan barak mak marka prezensa, hodi apresia demonstrasaun Spelling neebe dezafiante no merendas ba haree filme klasiku sira.
Nunee iha Agostu tinan nee, DIFF no Embaixada EUA sei organiza seminariu hirak kona-ba halo filme neebe lidera husi edukador filme Estadus Unidus nian Profesor DJ Johnson — ema neebe fila dala tolu ona mai Timor-Leste no fo formasaun kleur ona ba joven realizador filme sira neebe kobre konta istoria, tekniku halo filme, dezenvolvimentu kriativu, no dalan kareira nian ba maizumenus partisipantes nain 30, no konklui ho projesaun ida.
Tuir mai iha loron 15 Outubru kalan Filme Amerikanu iha DIFF26 sei hatudu projesaun filme klasiku eternu ida ho titulu Forrest Gump iha Platinum Cineplex, Timor Plaza – nee filme klásiku Amerikanu instantaneu ida neebe selebra reziliensia, laran-luak, no forsa duradoura espiritu umanu nian. Projesaun sira seluk agora iha hela faze planeamentu no sei fo sai iha tempu badak.
“Embaixada Estadus Unidus Amerika iha Dili sente orgullu hodi kontinua nia parseria kleur ona ho DIFF no PixelAsia Productions, sira neebe ami hein ba oin atu selebra konta istoria no arte enkuantu hametin lasus amizade entre povu Amerikanu no Timoroan,” haktuir karta nee.
Nunee mos Estudante UNTL, Fakuldade Edukasaun, Lorenca Goncalves hatete, nudar sidadaun no estudante neebe marka mos prezensa iha abertura projesaun gratuitu filme nee apresia tebes, tanba filme nee nudar inspirador ida kona-ba konfiansa, mentorizasaun, no kbiit transformador husi edukasaun.
Nia hatutan, alende nee kontenti haree joven sira neebe kriador no emerjente sira. Joven sira realizador sira nee kuaze DIFF nia antigu-alunus sira.
Nunee mos Estudante UNTL, Amau Correia hatete, filme nudar kooperasaun entre EUA ho DIFF, hodi fahe ba malu nudar oprortunidade, edukasaun no seluk tan baru komunidade TL nian.
(dom)
