DILI, STLTIMORLESTE.com – Liu husi komunikadu neebe STL asesu iha Media F-FDTL katak, Komando FALINTIL-Forsa Defesa Timor Leste (F-FDTL) liu husi Servisu Informasaun Militár hamutuk ho Seguransa Unidade Apoiu Kuartel Jenerál iha Sesta kalan kaptura joven nain rua neebe mak sobu asesores motor no naok kapasete inklui osan iha areadores Kuartel Jenerál, bainhira asiste jogu FUTSAL iha kampo FUTSAL Fatuhada, Dili.
Suspeitu nain 2 nee ho inisial JEA ho OFS, sasan neebe mak sira foti hanesan osan ho kapasete no sobu asesores motor nian.
Tuir informasaun vitima neebe sasan lakon hanesan militar neebe aprezenta emidiata ba diresaun D6-IT hodi konfirma CCTV, maibe la detekta pesoál hirak nee nia oin tanba taka metin ho kapasete, no sira rasik hatene CCTV nia lokalizasaun nunee la fo oin ba kamera neebe Komando F-FDTL instala ona iha areadorés Kuartel Jenerál.
Nunee diresaun seguransa militar Quartel General ho medida no reforsu seguransa masimu liu husi tatiku neebe iha, hodi detekta no kaptura suspeitu neebe durante nee naok sasan iha areadores instalasaun militar nian.
Suspeitu nain 2 refere Komando F-FDTL submete ba inkeretu interna iha Informasaun Militár nian no haree ba faktus sira neebe suspeitu halo, Komando F-FDTL kanaliza kedas ba servisu investigasaun Kriminál Polisia Nasionál Timor Leste (PNTL) Eskuadra Dom Aleixo, hodi prosesa tuir tuir aktu krime neebe sira halo, no ikus iha julgamentu primeira instansia Tribunal Dili no suspeitu sira ba kumpri prizaun preventiva tuir aktu krime neebe sira halo iha instalasaun militár.
(jen)
