DILI, STLTIMORLESTE.com – Komando FALINTIL-Forsa Defeza Timor Leste (F-FDTL) submete ona proposta ba Ministeriu Defeza atu halo manutensaun ró militár Betanu neebe oras nee iha Behau ona.
Komandante Komponente Navál, Komodoro Higinio das Neves, hamutuk ho Xefe Estadu Maiór Jenerál FALINTIL-Forsa Defeza Timor Leste (F-FDTL), Tenente Jeneral Domingos Raul “Falur Rate Laek” submete ona proposta ba Ministru Defeza Kontra Almirante Donaciano do Rosário da Costa Gomes “Pedro Klamar Fuik” hodi halo manutensaun ba ró militár Betanu.
Komodoro Neves esplika, proposta nee mosu hafoin ró militár Jako ne’ebé Governu no F-FDTL husik iha tasi Behau, Postu Administrativu Laklo, Munisípiu Manatutu, iha loron 7 Agostu liu ba, seidauk bele halo operasaun hodi kontrola atividade ilísitu sira iha tasi laran.
“Ró Betano nee agora ita hatama ona, agora iha Behau,” hatete Komandante Komponente Navál, Komodoro Higinio das Neves ba STL iha Kuartel Jenerál F-FDTL Fatuhada, Kuarta (26/8/2026).
Nia deklara, iha loron 16 Agustu nia partisipa mos reuniaun Komandante Komponente Navál ASEAN nian no husu atu hahu prepara prosesu manutensaun ba ro refere.
Nia esplika, kustu total ba manutensaun, tanba orsamentu mai husi Ministeriu Defeza neebe diretamente responsavel ba manutensaun ekipamentu militár hotu. “Ami so akompaña de’it, ami simu deit,” nia informa.
Entretantu dadus neebe STL asesu katak, ró militár Jako neebe Governu no F-FDTL husik iha tasi Behau, Postu Laklo, Munisípiu Manatutu, iha 7 Agustu 2026, seidauk bele halo operasaun ba kontrola atividade ilísitu sira iha tasi laran. Tanba nee, F-FDTL fo prioridade ba manutensaun ró Betanu.
Too agora seidauk iha dadus publiku konaba valor orsamentu, durasaun tempu manutensaun, no kompanhia neebe sei halo servisu nee. Informasaun hotu konaba kustu no kontratu sei iha Ministeriu Defeza.
(jen)
