DILI, STLTIMORLESTE.com – Liu husi Komunikadu Impresa iha Media F-FDTL neebe STL asesu katak, Komando FALINTIL-Forsa Defeza Timor Leste (F-FDTL) partisipa iha Ezersísiu FELINO 2026, neebe halao iha Foz do Iguaçu, Estado do Parana, Repúblika Federativa Brazil, husi loron 10 too 20 Agostu 2026.
Delegasaun F-FDTL lidera husi Koronel Tirocinado Mário Baptista “Bersama”, nuudar Xefe Delegasaun neebe reprezenta Xefe Estadu Maior Jenerál F-FDTL, Tenente General Domingos Raúl “Falur Rate Laek”, atu partisipa iha atividade nee hamutuk ho CEMGFA sira husi nasaun membru Comunidade dos Países de Língua Portuguesa (CPLP).
Ezersísiu FELINO 2026 ho tema “Com Forças no Terreno”, ho objetivu atu hametin kooperasaun, koordinasaun no interoperabilidade entre forsa armada husi nasaun sira membru CPLP, liu-liu iha area operasaun konjunta no preparasaun militar.
Enseramentu Ezersísiu FELINO 2026 halao iha loron 20 Agostu 2026. Iha serimónia enseramentu, CEMGFA Brasil entrega Bandeira CPLP ba Coronel Tirocinado Mário Baptista “Bersama”, nuudar símbolu transferénsia responsabilidade ba Timor-Leste, tanba iha tinan 2027, Timor Leste sei sai uma-nain ba Ezersísiu FELINO CPLP.
Entrega Bandeira CPLP nee sai símbolu importante ba Timor Leste, tanba hatudu konfiansa no responsabilidade neebe sei fo ba Timor Leste atu prepara no halao Ezersísiu FELINO iha tinan oin mai.
(jen)
