DILI, STLTIMORLESTE.com – Fakuldade Edukasaun Instituto Superior Cristal (ISC) kuaze 80% husi graduadu sira sai profesór iha nivel ensinu baziku, sekundáriu jerál no tékniku vokasionál.
Dekanu Fakuldade Edukasaun ISC, Zélio da Conceição Freitas hato’o informasaun ne’e ba STL iha Kampus ISC Balide, iha loron Kuarta (16/09/2026).
Nia esplika katak, objetivu prinsipál husi Fakuldade Edukasaun mak prepara graduadu sira atu sai profesór ho kompeténsia iha área ensinu baziku, sekundáriu jerál no tékniku-vokasionál.
“Output sai husi ami nia fakuldade kuaze 80% sai profesór, ami bele hatene ida-ne’e liu hosi kualidade interna ne’ebé ami iha, inklui estudu no peskiza konaba graduadu sira,” dehan Zélio.
Nia hatete, rezultadu ne’e mos bazeia ba dadus ne’ebé halibur liuhosi rede antigos alunus ISC no monitorizasaun ba graduadu sira iha munisípiu sira.
“Graduadu sira kada tinan ne’ebé sai husi ami, dadus hatudu katak kuaze 80% sai profesór, no balun sai membru PNTL, lideransa suku, postu administrativu no munisípiu,” nia dehan.
Tuir Dekanu, antigos alunus ISC agora servisu iha munisípiu 13, inklui nu’udar profesór, diretór no vise diretór eskola.
Relasaun entre antigos alunus no instituisaun mos ajuda fakuldade atu hatene rezultadu graduadu sira iha kampu servisu.
Nia aumenta katak, profesór ne’ebé sai hosi Fakuldade Edukasaun ISC hanorin iha eskola públika no privadu iha Timor-Leste.
Fakuldade Edukasaun ISC atualmente iha departamentu 10, inklui Matemátika, Fízika, Kímika, Biolojia, Psikolojia, Sosiojolojia, Portugés, Inglés no Informátika.
Fakuldade ne’e iha dosente liu 100, ho atividade akadémika ne’ebé hala’o iha polo sira iha Baukau, Aileu no Manufahi.
(joa)
