DILI, STLTIMORLESTE.com – Eskola hirak neebe mak lokaliza iha Munisipiu Ainaro balun sei falta meza no kadeira, tanba nee Servisu Edukasaun Munisipiu (SEM) Ainaro submete ona pedidu ba Ministeriu Edukasaun Nasional.
Lia hirak nee hatoo husi Diretor Servisu Edukasaun Munisipiu Ainaro, Patricio da Costa Magno ba STL liu husi telefone, Tersa nee (04/08/2026).
“Preokupasaun neebe mak ita nian eskola sira infrenta mak konaba fasilidade meza no kadeira neebe mak iha ita nian eskola balun sei menus hela, ita nian meza no kadeira hirak nee sei falta hela iha ita nian eskola sira, nee ita halo ona pedidu ba Ministeriu Edukasaun, hodi hein Ministeriu Edukasaun mak bele halo distribuisaun ba fasilidade sira nee,” katak nia.
Nia dehan, eskola hotu iha Munisipiu Ainaro barak sei falta meza no kadeira, ba asuntu ida nee SEM Ainaro halo ona karta pedidu ba Ministeriu Edukasaun, maibe too agora seidauk hetan resposta husi Ministeriu Edukasaun.
Munee mos Diretor Servisu Edukasaun Munisípiu Liquiça, Julio da Silva dehan, fasilidade hanesan meza no kadeira too ohin loron sei menus hela. Servisu Edukasaun Munisipiu Liquiça identifika eskola ensinu baziku 20 resin sei menus meza no kadeira.
“Hau hanoin ita nian eskola balun iha Munisipiu Liquiça too ohin loron sei menus hela, ami halo ona pedidu ba Ministeriu Edukasaun Nasional, maibe too ohin loron ninia rezultadu seidauk iha. Ami nian pedidu nee hatama dezde iha fulan Junhu ou Julhu tinan ida nee, ami identifika eskola ensinu baziku 20 resin mak sei menus meza no kadeira,” nia afirma.
Julio akresenta, meza no kadeira ba nivel sekundariu no tekvo nee iha ona. Dadus ida agora 20 nee nibel ensinu baziku deit mak sei menus meza no kadeira, espera iha tempu besik ministeriu bele haree asuntu ida nee.
(jac)
