DILI, STLTIMORLESTE.com – Xefe Estadu Maior Jeneral FALITIL-Forsa Defeza Timor Leste (F-FDTL), Tenente Jeneral Domingos Raul “Falur Rate Laek” fo ona orientasaun ba servisu informasaun F-FDTL, atu buka tuir ema sira neebe lori arma tiru karreta Hilux Toyota, neebe para hela iha empreza Lisun Fatuhada, iha loron Sabadu semana kotuk.
“Horiseik hau orienta ona servisu informaun forsa armada nian atu buka tuir ema deskonhesidu sira neebe uza arma tiru, ita la tolera hahalok ida nee,” dehan Xefe Estadu Maior Jeneral FALITIL-Forsa Defeza Timor-Leste (F-FDTL), Tenente Jeneral, Domingos Raul “Falur Rate Laek” ba jornalista sira iha Kuartel Jeneral F-FDTL, Fatuhada, Dili, Kuarta (29/01/2025).
Nia dehan, bazeia ba informasaun neebe mak husi Komisariu Jeral Polisia, Henrique da Costa katak, kazu bala musan nee akontese dala tolu ona, ida mak bala musan neebe ema deskonhesidu tiru antigu Prezidente Lú Olo iha Farol, ida akontese iha Taibesi no ida seluk mak kontese foin daudaun nee ema deskonhesidu tiru tan arma karreta Hilux Toyota neebe para hela iha empreza Lisun Fatuhada.
Nia apelu ba militar hotu- hotu sira neebe ativu, sira neebe la ativu no sira neebe reformadu hotu-hotu tenke kontribui.
“Komunidade ho juventude sira atu kontibui para ita hatene kilat musan nee se mak tiru, mai husi neebe, ita tenke hatene para ita identifikadu. Porke nee hanesan prezente aat neebe ita hahu, tanba nee ita tenke buka hamate kedas,” nia esplika.
Nia informa, ohin loron nee todo posivel, komersiu negro, arma sira nee ema bele sosa lemo lemo.
“Ita nian kapasidade kontrola martima, ita nian Autoridade Martima neebe sei funsiona diak sei iha hela neeba, depois ita nian Fronteira neeba sistema kontrolu neeba mos ita foin mak hahu. Ema tama posivel bele kaer kilat illegal, ema kaer faan no sosa nee kualker ema bele sosa no halo rakitan ema bele halo, joven ida bele halo buat ruma,” nia deklara.
Iha fatin hanesan, Fundasaun Mahein (FM) husu halo Investigasaun klean ba bala musan neebe sidadaun Timoroan ida lori husi Indonezia mai Timor Leste (TL), no mos ema deskonhesidu uza kilat hodi tiru dezidensia Eis PR Lú Olo inklui mos akontese ida ema deskonhesidu tiru karreta, tanba ida nee problema kriminal no problema konvensional ho kilat.
“Bala musan neebe ita nia sidadaun lori tama mai iha ita nia rai presiza investigasaun klean husi Instituisaun relevante atu ita bele hatene bala musan nee nia foti husi neebe, lori tama atu halo saida, presiza investigasaun mak ita foin hatene, inkuli mos ba ema neebe deskonhesidu tiru karreta no Eis PR, Lú Olo nia rezidensia,” nia afima.
Diretor FM nee husu PNTL atu halo investigasaun klean ba krimi sira nee, tanba bele fo ameasa ba indisiu seguransa nasional.
(jen)