DILI, STLTIMORLESTE.com – Xefe Estadu-Maior Jenerál FALINTIL-Forsa Defeza Timor Leste (F-FDTL), Tenente Jeneral Domingos Raul “Falur Rate Laek” lidera serimónia hasa’e Bandeira Nasionál iha Kuartel Jenerál, Dili.
Liu husi Komunikadu Impresa ne’ebe STL asesu iha media F-FDTL katak, Tenente-Jenerál Domingos Raúl “Falur Rate Laek” Xefe Estadu-Maior Jenerál F-FDTL Tenente Jeneral Domingos Raul “Falur Rate Laek” loron prezide serimónia primeira semana fulan Outubru, ne’ebé hala’o ohin dadeer.
Nia dehan, serimónia regular ne’e objetivu hametin disiplina, unidade no responsabilidade membru F-FDTL no Ministériu Defeza iha hala’o kna’ar.
Falur Rate Laek enkoraja membru F-FDTL no Ministériu Defeza atu kontinua servisu ho dedikasaun, maski hasoru dezafiu no difikuldade.
Nia hateten katak tinan 2026 besik remata, nune’e membru hotu presiza prepara an no servisu hamutuk hodi atinji objetivu institusionál.
“Fulan rua tan ita sei tama tinan foun. Ita tenke prepara an no kontinua servisu hamutuk, maski iha dezafiu,”hatete Xefe Estadu-Maior Jenerál F-FDTL Tenente Jeneral Domingos Raul “Falur Rate Laek” ba jornalista sira liu husi nia deskurus iha Kuartel Jeneral F-FDTL Fatuhada Dili, segunda (05/10/2026).
Falur Rate Laek hateten katak, difikuldade sira la bele sai razaun atu hafraku servisu no responsabilidade institusionál.
Iha serimónia ne’e, nia mós ko’alia kona-ba prosesu administrativu balu ne’ebé seidauk remata tanba enfrenta atrazu.
Prosesu sira ne’e inklui tranzisaun, nomeasaun no promosaun, ne’ebé hela iha prosesu administrativu.
Nia hateten katak, prosesu refere hetan atrazu tanba Ministro Defeza atualmente halo hela tratamentu saúde iha liur.
Falur Rate Laek hato’o esperansa atu Ministro Defeza bele rekupera lalais, fila mai no kontinua apoia F-FDTL.
Apoiu ne’e konsidera importante, liuliu ba prosesu tomada desizaun no implementasaun planu institusionál.
Serimónia ne’e remata ho apelu ba membru F-FDTL atu kontinua hametin disiplina, unidade, responsabilidade no espíritu servisu.
Atividade ne’e envolve Ministériu Defeza, F-FDTL, Instituto Defesa Nasionál no Autoridade Marítima Nasionál.
(jen)
