BAUCAU, STLTIMORLESTE.com – Família uma kain hamutuk 188 iha Suku Uacala, Postu Administrativu Baguia, Munisípiu Baucau, to’o agora hein apoiu ai-han husi Ministériu Solidariedade Sosiál no Inkluzaun (MSSI).
Xefe Suku Uacala, Salustiano Ximenes Guterres hateten, maioria komunidade iha suku Uacala moris depende ba atividade agrikultura, liuliu rezultadu husi to’os no natar, hodi sustenta nesesidade no ekonomia família.
Maibé, tuir nia, iha família balu ne’ebé hasoru kondisaun vulnerável liu tanba rendimentu husi atividade agrikultura menus, inklui limitasaun fízika ne’ebé halo sira labele kontinua servisu iha to’os no natar.
“Família balu ha’u hare’e vulnerável ba aihan. Foin dadauk programa MSSI nian atu fahe duni ba família vulnerável sira, ami prepara hela 188 família mak ami prepara ona nia lista atu simu ai-han,” hateten Salustiano Ximenes Guterres ba STL iha Vila Nova, Baucau, Tersa (22/09/2026).
Autoridade Suku Uacala ne’e esplika katak, vulnerabilidade família sira ne’e la’ós tanba sira lakohi servisu ba sira nia kabun no família, maibé mos relasiona ho kondisaun saúde no infraestrutura ne’ebé sei limita sira nia oportunidade atu hetan rendimentu.
Nia hateten, kondisaun estrada mak sai obstákulu ida ba komunidade, liuliu estrada ligasaun husi Suku Uacala ba Baguia Vila no husi Uacala ba estrada nasionál iha diresaun Laga-Baguia.
Kondisaun ne’e, tuir Xefe Suku, afeta movimentasaun komunidade no transporte públiku atu lori produtu agrikultura husi área rural ba merkadu, inklui merkadu iha Munisípiu Baucau.
“Tanba kondisaun estrada refere mos parte ida difikulta movimentasaun transporte públiku atu lori sai komunidade agrikultura sira nia produtu lokal ba merkadu, hodi hetan rendimentu atu sustenta ekonomia família,” nia hateten.
Iha parte seluk, Autoridade Suku Uacala hateten katak, preparasaun dadus kona-ba família vulnerável sira ne’e hala’o ona tuir orientasaun husi Ministériu, hodi identifika família sira ne’ebé presiza hetan apoiu ai-han.
Família ne’ebé tama iha lista vulnerável, tuir Autoridade Suku, inklui ema ho defisiénsia, idozu no idoza, no ema ho idade ne’ebé la produktivu tanba limitasaun sira-nia kondisaun.
“Ministériu orienta ami ne’e iha tinan duni, maibé to’o agora seidauk. Vunerável ne’ebé ami rekoilla mak ema ho defisiénsia, idozu, idoza no idade la produtivu sira ne’e mak ami rekoilla,” hateten Salustiano.
(tom)
