BAUCAU, STLTIMORLESTE.com – Família matebian Libório Francisco Correia, idade 23, ne’ebé mate iha asidente tráfiku iha área Suku Tirilolo, Postu Administrativu Baucau Vila, husu Komando Polísia Munisípiu Baucau atu prosesu kazu asidente refere tuir lei.
Família António Correia haktuir katak, iha loron 18 Setembru 2026, matebian Libório Francisco Correia hala’o servisu tula fatuk iha área Suku Seiçal, Postu Administrativu Baucau Vila.
Hafoin remata servisu ne’e, Libório ho nia família Tito Selo Freitas, idade 30, sira na’in rua utiliza motor Honda Beat, sapa matríkula Y-4437-TL, kor metan kontinua ba área Vila Antiga Baucau atu hariis iha pisina.
Maibé, bainhira sira to’o iha estrada públika diresaun Baucau Vila–Laga, iha área Suku Tirilolo, sira hetan asidente ho kareta truk matríkula A.52.147-TL, ne’ebé tula rai-henek diresaun ba Postu Administrativu Laga.
António Correia hateten katak família simu informasaun kona-ba asidente no ba fatin atu haree, maibé Libório laiha ona iis.
“Nia iha Seiçal tula fatuk, nia mai pisina atu haris, mak akontese hanesan ne’e. Ami mai tuir haree nia belit kedas iha kareta okos, mate tiha ona,” hateten António ba jornalista sira iha HoREX Baucau, Sesta (18/09/2026)
Asidente ne’e rezulta Libório Francisco Correia mate iha fatin, enkuantu Tito Selo Freitas hetan kanek, ne’ebé hetan ona tratamentu iha Sala Emerjénsia Hospital Rejionál Eduardo Ximenes (HoREX) Baucau.
Ba asidente ne’e, Família matebian husu autoridade kompetente, liuliu Polísia, atu halo investigasaun no prosesu kazu refere.
“Ami husu para Polísia tenke prosesu kazu ne’e ba oin,” António rekomenda
Enkuantu, Xefe Departamentu Sala Emerjénsia HoREX Baucau, Bazilia dos Santos Freitas, komfirma katak Tito Selo Freitas hetan tratamentu iha unidade saúde refere hafoin hetan asidente.
“Nia mai ho kondisaun ne’ebé diak, agora sementara observasaun hela. Nia hetan pankada natoon, la dun kanek, maibé iha nia ulun no nia liman parte loos hetan kanek no ros oituan iha mos ain-tur. Maibé nia kondisaun kamaan,” esplika Bazilia
Tuir Bazilia, bazeia ba informasaun ne’ebé Sala Emerjénsia HoREX simu, asidente refere rezulta ema ida mate iha fatin. Maibé, unidade emerjénsia la hetan detallu kona-ba kanek ka pankada ne’ebé vítima mate hetan, tanba vítima ne’e la rejista iha Sala Emerjénsia.
To’o notísia ne’e publika, STL seidauk hetan resposta ka informasaun ofisiál husi Komando Polísia Munisípiu Baucau kona-ba kronolojia no prosesu investigasaun ba asidente refere.
Maibé, bazeia ba observasaun STL iha terenu nota, Komando Polísia Munisípiu Baucau, liuhusi Seksaun Tránzitu, asegura ona evidénsia sira relasiona ho asidente refere, inklui kareta truk no motor ne’ebé involve iha asidente ne’e asegura ona iha edifísiu Komando Polísia Munisípiu Baucau.
Evidénsia sira ne’e sei sai parte husi prosesu investigasaun Polísia hodi determina kronolojia no kauza asidente tráfiku ne’ebé rezulta Libório Francisco Correia mate iha fatin.
(tom)
