SOIBADA, STLTIMORLESTE.com – Dadeer seidauk nakonu ho movimentu, família boot STL hahú ona dalan ho fuan nakonu ho orasaun, esperansa no gratidaun ba Na’in Feto Ai Tara.
Tuku 6:00 dadeer, sira sai husi Dili. Dalan naruk ba Soibada la’ós de’it viajen ba fatin sagrada, maibé dalan ida ne’ebé lori memória no esperansa.
Iha karreta laran, silêncio no orasaun akompaña sira-nia dalan. Kada quilómetru ne’ebé sira liu, hanesan lori fali istória kona-ba tempu ne’ebé STL hasoru difikuldade.
Ba família boot STL, tempu susar la halakon sira-nia fiar. Pelo kontráriu, tempu ne’e halo sira aprende atu taka liman, hamutuk no husu tulun ba Maromak.
Durante períodu difísil, sira halibur hamutuk iha instituisaun no halo Novena, meditasaun no reza Tersu. Sira mos vizita fatin sagrada hodi hato’o intensaun.
Fatubessi, Ai Tara, Ariana, Ramelau no Kristu Liurai Matebian sai fatin sira ne’ebé família STL lori sira-nia lian ba Maromak.
Orasaun sira ne’e la’ós de’it atu husu. Iha laran mos iha agradecementu, tanba sira fiar katak maski dalan nakukun, Maromak seidauk husik sira mesak.
Iha momentu ne’ebé instituisaun sente katak nia dalan sai todan, família boot STL buka forsa iha fé.
Sira mos hakerek karta ba Prezidente Repúblika José Ramos-Horta, hodi hato’o sira-nia preokupasaun no husu apoiu ba família boot STL.
Ba sira, resposta no apoiu ne’ebé sira simu sai hanesan naroman iha tempu ne’ebé sira sente dalan sai nakukun.
Tanba ne’e, peregrinasaun ba Soibada sai hanesan resposta husi fuan ida ne’ebé hakarak dehan liafuan simples, maibé boot tebes nia signifikadu agradese.
Iha Santuáriu Soibada, família boot STL ne’ebé lidera husi CEO Salvador Januario Soares hahú ho orasaun Santíssimu.
Hafoin, sira kontinua reza Tersu husi Igreza Tuan Soibada ba Santuáriu. Kada pasu sai hanesan pasu ida ne’ebé besik liután ba fatin sira-nia intensaun.
To’o iha santuáriu, sira tuur iha silêncio no halo meditasaun durante minutu 20. Iha momentu ne’e, la iha barullu, la iha presa. Iha de’it fuan no Maromak.
Hafoin meditasaun, sira kontinua ho reza Tersu. Orasaun sira ne’e sai hanesan liafuan ne’ebé la presiza gritu, tanba sira fiar Na’in Feto rona ona.
CEO STL, Salvador Januario Soares, hatete katak peregrinasaun ne’e iha intensaun boot ida, mak hato’o agradese ba Maromak no Na’in Feto. No agradese ba Prezidente Repúblika Jose Ramos Horta ne’ebé tulun sira iha tempu difisil.
“Intensaun husi peregrinasaun ne’e atu hato’o agradese ba Maromak no Na’in Feto, tanba durante tempu difísil ita hasoru laloran boot.” dehan CEO STL
Salvador mos hato’o orasaun espesial ba Prezidente Repúblika José Ramos-Horta, hodi husu saúde di’ak no vida naruk.
“Ita mós harohan ba Na’in Feto atu haraik saúde di’ak ba Prezidente Repúblika José Ramos-Horta, vida naruk, hamutuk ho Primeiru-Ministru Kay Rala Xanana Gusmão lori rai ne’e ba oin.” dehan CEO.
Ba família boot STL, José Ramos-Horta la’ós de’it Prezidente Repúblika. Iha sira-nia sentimentu, nia sai ema ida ne’ebé rona sira-nia lian bainhira sira hasoru tempu todan.
Apoiou ne’ebé sira simu halo sira kompriende katak iha tempu susar, ema ida nia liman bele sai forsa ba ema seluk.
Tanba ne’e, iha santuáriu, naran Prezidente mos tama iha sira-nia orasaun. Sira husu Na’in Feto atu fó bensaun, saúde no forsa ba nia.
Sira husu mos atu nia kontinua servisu ba povu, liuliu ba povu ki’ik sira ne’ebé moris ho nesesidade no presiza tulun.
Orasaun ne’e mos ba instituisaun STL. Família boot ne’e husu Na’in Feto no Na’in Jesus atu kontinua akompaña instituisaun no funsionáriu hotu.
Sira husu atu funsionáriu bele hala’o knaar ho profisionalizmu, responsabilidade no fuan nakonu ho servisu, no hadook an husi buat aat hotu.
STL liu ona hosi tempu difísil, inklui impaktu pandemia COVID-19 no krize ne’ebé afeta atividade no rendimentu instituisaun.
Maibé, iha tempu ne’ebé susar, família boot ne’e la husik malu. Sira halibur, ko’alia, harohan no buka dalan atu hamriik fali.
peregrinasaun ne’e iha signifikadu liután. Sira la’o ba Soibada la’ós tanba hotu ona problema, maibé tanba sira hakarak agradece ba dalan ne’ebé sira liu ona.
Iha santuáriu, sira hanoin fali kona-ba tempu ne’ebé sira tauk, tempu ne’ebé sira duvida, no tempu ne’ebé sira nafatin husu “Oinsá ami sei kontinua?”
Agora, iha fuan ne’ebé nakonu ho gratidaun, resposta ne’e sai iha forma peregrinasaun.
Dalan ba Soibada sai hanesan ponte entre laran susar no esperansa. Iha kada pasu, sira lori memória, iha kada orasaun, sira lori esperansa.
No bainhira remata orasaun, sira la fila ho promessa katak dalan sei fasil. Sira fila ho fiar katak sira la mesak iha dalan.
Hafoin vizita Na’in Feto Ai Tara, família boot STL fila fali ba Dili. Iha Metinaro, sira para tuur hamutuk ho kafé manas.
Iha momentu simples ne’e, sira kontinua fahe hanoin kona-ba futuru instituisaun STL, planu no programa atu haforsa kobertura iha terenu.
Dalan peregrinasaun remata, maibé intensaun seidauk remata.
Orasaun sei kontinua. Servisu sei kontinua. Esperansa sei kontinua.
Tanba ba família boot STL, Soibada la’ós de’it fatin ida ne’ebé sira vizita.
Soibada sai fatin ida ne’ebé sira tau sira-nia fuan, hato’o sira-nia agradecementu, no husu forsa atu fila fali ba dalan.
Iha ikus, liafuan ne’ebé simples ne’e nafatin iha sira-nia fuan: “Agradese ba Maromak. Agradese ba Na’in Feto. Agradese ba ema sira ne’ebé hamriik hamutuk ho ami.”
(eme)
