BAUKAU, STLTIMORLESTE.com – Fatin sanitasaun iha merkadu foun Tuanau Baukau, negosiante sira utiliza seidauk too fulan hahu aat ona.
Tuir observasaun STL nian iha loron 29 Novembru 2024 nota katak, fatin sintina ka sanitasaun hamutuk kuartu 3 neebe estabelese iha merkadu refere hahu avaria.
Iha konfirmasaun, negosiante roupa loja, Cedelizio Baptista Freitas Fraga sente triste ho kondisaun refere, tanba bele kontribui ba sidadaun sira soe foer kiik no boot arbiru iha areadores merkadu nian, mezmu fasilidade hanesan fatin sintina instala ona, maibe la sufisiente no daudaun hahu aat ona.
“Ami sente triste, tanba loron Domingu no Kinta bazar rame, tanba ema tun husi foho barak, maibe sintina nee dois liu ami hela besik la tahan nia iis,” Cedelizio hateten ba STL iha Merkadu Tuanau, Sesta (29/11/2024).
Nia sublina, fatin sintina refere aat, tanba sidadaun sira soe foer kiik no boot iha laran, maibe laiha bee atu rega, nunee hada deit fatuk iha leten too nakfera.
Iha sorin seluk, negosiante sembaku, Rosa Juliana Soares akresenta, kondisaun merkadu laiha fatin sanitasaun sei fo impaktu ba nesesidade sae foer kiik no boot obrigatoriu soe deit iha areador merkadu nian.
Entretantu tuir dadus negosiante neebe STL asesu muda ba merkadu foun Tuanau hamutuk 879, ho tipu negosiu obralan 148, roupa loja 125, faan sapatu 87, sembako 146, sasan dapur 54, kolisaun 10, alfateh 14, faan sana rai 3, Tais Timor 7, faan telefone 15, baber shop 5, sasan eletroniku 9, kosmetik 13, faan osan mean 1, faan pulsa EDTL 2, faan aimoruk ba Agrikultura nian 1, Farmasia 1, faan naan karau no seluk tan 10, faan ikan 23, Produtu lokal 200 no mini restorante 7.
(EST 2)
